103 yachachiy

Wisqʼasqa wasipi rikhurin

PEDRO Juanwan Jesuspa pʼampananmanta lluqsiptinku, Mariaqa sapitan qhipakuspa, waqayta qallarirqa. ¡Chanta pʼanpana ukhuta qhawaspa, iskay angelesta rikurqa! Angelesqa tapurqanku: ‘¿Imarayku waqachkanki?’, nispa.

María kutichirqa: ‘Señorniyta apakapunku, manataq maymanchus churasqankuta yachanichu’, nispa. Kutirikuspa juk runata rikurqa. Chay runataq Mariata tapurqa: ‘¿Pitataq maskʼachkanki?’, nispa.

María jardinero kasqanta yuyaspa nirqa: ‘Qamchus Señorta aparqanki chayqa, maymanchus churasqaykita willaway’, nispa. Chay runaqa Jesús karqa. Mariaqa mana ripararqachu Jesús kasqanta. Jesús sutinmanta waqyaptintaq, María Jesús kasqanta yacharqa. Chanta usqhayta rispa, discipulosman nirqa: ‘!Señorta rikuni!’ nispa.

Chay pʼunchayllataq, iskay discípulos Emaus llaqtaman richkaptinku, juk runa paykunaman kʼaskaykurqa. Paykuna Jesús wañupusqanmanta llakisqa kachkarqanku. Puriqjina chay runa Bibliawan discipulokunata sunqucharqa. Mikhunapaq wakichikuchkaptinku discipulosqa, chay runa Jesús kasqanta reparanku. Jesustaq chinkapurqa. Apostolestaq Jerusalenman chayta willaq kutirqanku.

Chaykama, Jesús Pedromanpis rikhurillarqataq. Chayta uyarispa wakin discípulos mayta kusirikurqanku. Chay iskay discípulos Jerusalenpi apostoleswan tinkuytawan, paykunamanpis Jesús rikhurisqanta willarqanku. Paykuna kayta willachkaptinku, juk runa chaypi rikhurirqa.

Dibujota qhawariy. Chay wasip punkun wisqʼasqa kachkaptin Jesús paykunap chawpinpi rikhurirqa. ¡Maytacha discipulokuna Jesusta rikuspa kusikurqanku! ¡Chay pʼunchayqa may sumaq karqa! ¿Machkha kutitaña Jesús rikhurirqa? ¿Phichqañachu?

Apóstol Tomasqa chay kutipi mana discipuloswan kachkarqachu, chayrayku discípulos: ‘¡Señorta rikuyku!’, nispa niptinku, Tomás nirqa, ‘chayta creenaypaqqa, ñuqapuni payta rikunay tiyan, nispa. Chaymanta 8 pʼunchayninman, juktawan discipulosqa wisqʼasqa wasipi kachkarqanku. Chayllapi Jesús rikhurirqa, Tomasqa chaypi kachkarqa, Jesusta rikuspataq creerqa.

Juan 20:11-29; Lucas 24:13-43.