PEDRO no João husik tiha rate neʼebé uluk ema tau Jesus nia isin-mate, Maria mesamesak deʼit iha neʼebá. Nia hahú tanis. Tuirmai, nia hakruʼuk no hateke ba rate laran, hanesan ita haree tiha ona iha dezeñu antes ida-neʼe. Iha neʼebá, nia haree anju naʼin-rua! Sira husu Maria: ‘Tansá ó tanis?’

Maria hatán: ‘Ema foti tiha haʼu-nia Naʼi, no haʼu la hatene sira tau nia iha neʼebé.’ Depois, Maria fila kotuk no haree mane ida. Mane neʼe husu Maria: ‘Ó buka sé?’

Maria hanoin katak mane neʼe mak tau matan ba jardín, no karik nia mak foti tiha Jesus nia isin. Nuneʼe, nia hatete: ‘Ita mak foti nia karik, hatete mai haʼu iha neʼebé mak Ita tau ninia isin-mate.’ Maibé, tuir loloos, mane neʼe mak Jesus. Nia mosu ho isin neʼebé Maria la rekoñese. Maibé, kuandu nia bolu hodi temi Maria nia naran, Maria hatene kedas nia mak Jesus. Maria halai no hatete ba dixípulu sira: ‘Haʼu haree ona Naʼi!’

Lokraik iha loron neʼe, dixípulu naʼin-rua laʼo daudauk toʼo aldeia naran Emaús, mane ida hahú laʼo hamutuk ho sira. Dixípulu sira-neʼe triste tebes tanba ema oho tiha Jesus. Maibé tuir dalan, mane neʼe esplika buat barak husi Bíblia no halo sira sente diʼak liu. Tuirmai, kuandu sira para atu han, dixípulu sira-neʼe rekoñese katak mane neʼe mak Jesus. Ikusmai Jesus lakon tiha, no dixípulu naʼin-rua neʼe lalais fila fali ba Jeruzalein atu fó-hatene ba apóstolu sira kona-ba nia.

Molok sira naʼin-rua toʼo Jeruzalein, Jesus mós mosu ba Pedro. Dixípulu sira seluk hakfodak ho kontente hodi rona kona-ba ida-neʼe. Tuirmai, dixípulu naʼin-rua neʼe toʼo tiha Jeruzalein no hasoru apóstolu sira. Sira mós konta kona-ba oinsá mak Jesus mosu ba sira iha dalan. Oras neʼebé sira koʼalia daudauk kona-ba neʼe, hatene buat diʼak saida mak akontese?

Haree lai dezeñu neʼe. Derrepente deʼit Jesus mosu iha sala neʼe nia laran, maski odamatan neʼe taka metin hela. Dixípulu sira kontente tebes! Neʼe loron diʼak tebes, loos ka lae? Toʼo agora, ó bele sura dala hira mak Jesus mosu ba ninia dixípulu sira? Sura dala lima, loos ka lae?

Bainhira Jesus mosu, apóstolu Tomé la hamutuk ho sira. Nuneʼe, dixípulu sira fó-hatene ba nia: ‘Ami haree ona Naʼi!’ Maibé Tomé hatete katak se nia haree Jesus ho ninia matan rasik mak foin nia bele fiar. Liutiha loron ualu, dixípulu sira halibur fali iha sala neʼebé taka metin, no agora Tomé mós hamutuk ho sira. Derrepente, Jesus mosu iha neʼebá. Agora, Tomé mós fiar ona.