ER PETERU man Yohane ve undu uwar u yange ikom i Yesu lu la yô, Maria mase shin heregh tswen. Man a hii u vaan. Tsô a ngurum a gbir ashe ken uwar la, er se vande nengen ken foto u masejime la nahan. Tsô a nenge a mbatyomov uhar kimi! Ve pine un er: ‘Kanyi u vaan-a?’

Maria na ikar er: ‘Ve tôô Terem kera, man m fa ijiir i ve za ver un la ga.’ Tsô Maria gema ashe ken jime man a nenge a or. Or la pine un er: ‘Ka an u keren-e?’

Maria hen er ka orsule, man shi alaghga ka un a tee ikom i Yesu ye. Nahan a kaa a na er: ‘Aluer wea tôô un yô, kaam hen ape u za ver un la.’ Kpa, jim yô, or ne ka Yesu. A tôô iyol i Maria fatyô u kaven ga yô. Kpa shighe u a yila un sha iti yô, Maria fa er ka Yesu je la. A yevese a za kaa mbahenen er: ‘M nenge a Ter!’

Sha iyange shon la je, er mbahenen uhar ve lu yemen ken angar u Emou atetan yô, orgen va kohol ve gba zan a ve imôngo. Mbahenen mban lu ken mzungu kpishi sha ci u í wua Yesu. Kpa er ve lu yemen yô, or la pase ve akaa ken Bibilo kpishi a a na ishima pever ve kimi yô. Ken masejime, shighe u ve tile sha u yan kwaghyan yô, mbahenen mban mase kaven ér or ne ka Yesu. Tsô man Yesu ndiir, man mbahenen mba uhar mban ve hide ve yem fefa sha u za ôron mbaapostoli kwagh na ken Yerusalem.

Er kwagh ne lu eren zan heregh la je, Yesu za ande hen Peteru. Mbagenev mbara ve ember kpishi shighe u ve ungwa kwagh ne yô. Nahan mbahenen mba uhar mban ve hide ken Yerusalem sha u za keren mbaapostoli. Ve ôr ve e̱r ve kpaa Yesu ande hen ave sha gbenda nahan. Man er ve lu ôron ve kwagh ne zan a mi ave la je, ú fa kwagh u kpilighyol u a e̱r kpa?

Kenger foto u a lu heen ne. Yesu ande ken iyou ne heen jim jim, shin er i wuhe iyou ne i̱ lu vingir nahan kpaa. Saan mbahenen iyol tsô! Ngula ka iyange i msaanyol ga he? Ú fatyô u ôron kwa u Yesu a ande hen mbadondon un hegen kpa? Ú ôr a kuma kwa taan-naa?

Apostoli Toma lu vea ve shighe u Yesu ande la ga. Nahan mbahenen ôr un er: ‘Se nenge a Ter!’ Kpa Toma kaa er saa una nenge a Yesu iyolna cii ve una na jighjigh a kwagh la ye. Ka shami, ayange nga kar anigheni yô mbahenen lu ijiir i môm ken iyou i i wuhe la, man kwa ne yô Toma kpaa lu vea ve. Fese nahan, Yesu ande hen ave ken iyou la. Hegen Toma kpaa na jighjigh.