Makani 103: Muŋanda Iikkiidwe
PITA a Johane nibazwa kucuumbwe Jesu nkwaakazikkidwe, Maliya wacaala alikke acuumbwe. Watalika kulila. Kumane wasondela mucuumbwe mbuli mbotwabona acifwanikiso cili kunze. Oomu wabona bangelo bobilo. Bamubuzya Maliya kuti: ‘Ncinzi ncolila baama?’
Maliya waingula kuti: ‘Bamubweza Mwami wangu, alimwi tandizyi nkobamubikka.’ Kumane Maliya waceba wabona muntu umwi. Ooyu muntu wamubuzya wati: ‘Ngwani ngolangaula?’
Maliya uyeeya kuti muntu ooyu mulimi akuti ndiza ngooubweza mubili wa Jesu. Aboobo Maliya wati: ‘Ikuti naa waubweza mubili, kondaambila nkooubikka.’ Pele mubwini muntu ooyu ngu Jesu. Ujisi mubili Maliya ngwatakonzyi kuzyiba. Pele Jesu naamwiita Maliya zina, Maliya wazyiba kuti ooyu ngu Jesu. Wabalika kwaakwaambila basikwiiya, wati: ‘Ndamubona Mwami!’
Mbweena buzuba oobo kumazuba, basikwiiya bobilo kabeenda kuya kumunzi wa Emau, muntu umwi wabasangana mulweendo. Basikwiiya baluuside kapati nkaambo Jesu wakajaigwa. Pele kabeenda, muntu ooyu wapandulula zintu zinji zyamu Bbaibbele zyalo zyabatontomeka moyo. Nobaima kuti balye, basikwiiya bamuzyiba kuti muntu ooyu ngu Jesu. Kumane Jesu wazibaana, eelyo aaba bobilo basikwiiya cakufwambaana bajokela ku Jelusalemu kwaakwaambila baapositolo kuti bamubona Jesu.
Kabacaambaula, Jesu walibonya akuli Pita. Bamwi bakkomana nibamvwa makani aaya. Kumane basikwiiya aaba bobilo baunka ku Jelusalemu kwaakulanga baapositolo. Babaambila Jesu mbwaalibonya kuli mbabo abalo munzila. Mpeena buyo aawo kabacaamba makani aaya, hena ulicizyi cintu cilamya cacitika?
Langa acifwanikiso. Jesu walibonya muŋanda, nokuba kuti kumulyango kuli kkiidwe. Elo nkukondwa basikwiiya! Hena oobo tabuli buzuba bukkomanisya? Hena inga wakonzya kuzyibandauka ziindi Jesu nzyaalibonya kuli basikwiiya bakwe? Hena waamba kuti zili zyosanwe?
Imwaapositolo Tomasi tabali limwi Jesu naalibonya. Aboobo basikwiiya bamwaambila kuti: ‘Twamubona Mwami!’ Pele tanaasyoma Tomasi, uyanda kuti alibonene ameso kuti ooyu ngu Jesu. Kwiinde mazuba aali lusele, basikwiiya alimwi banjila muŋanda akukkiya kumulyango, aciindi aawa Tomasi awalo nkwali. Cakutayeeyelwa Jesu walibonya muŋanda. Lino Tomasi wasyoma.
Johane 20:11-29; Luka 24:13-43.
Mibuzyo
- Ncinzi Maliya ncaamba kumuntu ngwayeeya kuti mulimi, pele ncinzi camupa kuti azyibe kuti muntu ooyu masimpe ngu Jesu?
- Ncinzi cacitika kuli basikwiiya bobilo beenda kuya kumunzi wa Emau?
- Ncintu nzi cilamya cacitika basikwiiya bobilo nibali kwaambila baapositolo kuti bamubona Jesu?
- Nziindi zyongaye Jesu nzyaalibonya kuli basikwiiya bakwe?
- Ncinzi Tomasi ncaamba naamvwa kuti basikwiiya bamubona Mwami, pele ncinzi cacitika nokwainda mazuba aali lusele?
Mibuzyo aimwi
- Bala Johane 20:11-29.
Hena ku Johane 20:23 Jesu wakali kwaamba kuti bantu balijisi nguzu zyakulekelela zibi? Pandulula. (Int. 49:2, 7; Is. 55:7; 1 Timo. 2:5, 6; 1 Joh. 2:1, 2)
- Bala Luka 24:13-43.
Mbuti mbotukonzya kulibambila moyo wesu kutegwa tukonzye kumvwa kasimpe ka Bbaibbele? (Lk. 24:32, 33; Ezr. 7:10; Mt. 5:3; Inc. 16:14; Heb. 5:11-14)
Andiza Inga Mwaakkomanina Ayaaya
JESU—NENZILA, NGOKASIMPE, MBOBUUMI
Bantu Banji Bamubona Kalitanasika Pobwe lya Pentekoste
Kabukide kubafwu pele katanaunka kujulu, cakwiinduluka-induluka Jesu wakankaizya kwaamba ceeco basikwiiya bakwe ncobakali kuyootambula alimwi ambobakali kuyoocibelesya.
