HANYUMA ya Petero na Yohana okuruga ha kituro nambere omutumbi gwa Yesu gukaba guli, Malyamu bamusigayo wenka. Atandika kurra. Nubwo yainamire kandi akarora mukituuro nkoku turozire mukisisani eky’enyuma. Akarora bamaraika babiri! Bakamukaguza: ‘Habwaki norra?’

Malyamu abagarukamu ati: ‘Batwaire Mukama wange, kandi timanyire nambere bamutaire.’ Nubwo Malyamu yahinduka kandi akarora omusaija. Omusaija akaguza Malyamu ati: ‘Nosserra oha?’

Malyamu natekereza ngu omusaija onu nuwe mulinzi w’orugonjo, nti kandi nuwe asobora kuba yatwaire omubiri gwa Yesu. Nubwo yagamba: ‘Obworaba niwe omutwaire, ngambira nambere omutaire.’ Baitu mananu omusaija onu ni Yesu. Ajwaire omubiri Malyamu ogwatasobora kumanyirra. Baitu obu yamwesere nakozesa ibara lye, Malyamu ayetegereza ngu onu ni Yesu. Airuka agenda agambira abegeswa ati: ‘Ndozire Mukama!’

Hanyuma ekiro eki, abegeswa be babiri obubakaba nibarubata nibagenda mu kyaro Emau, omusaija aija arubata nabo. Abegeswa basaliirwe muno habwokuba Yesu aisirwe. Baitu obu babaire nibarubata, omusaija abasoborra bingi kuruga omu Baibuli ebyabaletiire kuhurra kurungi. Hanyuma, obu bayemeriireho kutunga ekyokulya, abageswa betegereza ngu omusaija onu nuwe Yesu. Aho nubwo Yesu yababuzireho, kandi abegeswa banu babiri banguha bagaruka Yerusalemu okugambira abakwenda ebikumukwataho.

Binu obu bikaba nibibaho, Yesu ayeyoleka Petero. Abandi begeswa basemererwa obu bakihuliire. Nubwo na banu abegeswa ababiri bagenda Yerusalemu kandi bahika ha bakwenda. Babagambira nkoku Yesu nabo abeyolekere mumuhanda. Kandi obubakaba nibakyagamba hali binu, omanyire ekyokuhuniriza ekyabaireho?

Dora ha kisisani. Yesu akeyoleka mukisiika n’obu kiri ngu orwigi rukaba rukingirwe. Abegeswa kabakasemererwa! Ekyo tikiri kiro ky’omuhimbo? Hati nosobora kubara emirundi Yesu eyi ayeyolekere abegeswa be? Obazire emirundi etaano?

Omukwenda Tomasi akaba tali nabo Yesu obu yabeyolekere. Nahabwekyo abegeswa baamugamba bati: ‘Turozire Mukama!’ Baitu Tomasi agamba ngu aine kwerorra Yesu, nukwo aikirize. Mali hanyuma y’ebiro munaana, abegeswa bali hamu mukisiika ekikingirwe, kandi ha murundi gunu Tomasi ali nabo. Ahonaho Yesu ayeyoleka mukisiika. Hati Tomasi aikiriza.