PETROSI na Yohane ŵakati ŵafumako ku dindi uko kukaŵa thupi la Yesu, Mariya wakakhalako yekha. Wakayamba kulira. Pamanyuma pake wakasindama na kulingizga mukati mu dindi, nga ni umo tanguwonera pa cithuzithuzi para. Mukati mu dindi wakawona ŵangelo ŵaŵiri! Ŵakamufumba Mariya ŵakati: “Ukuliraci?”

Mariya wakazgora wakati: ‘Ŵawuskamo Fumu yane, ndipo nkhumanya yayi uko ŵayiŵika.’ Mariya wakang’anamuka ndipo wakawona mwanalume munyake. Mwanalume yura wakamufumba kuti: “Kasi ukupenja njani?”

Mariya wakaghanaghananga kuti ni mulimi, ndipo kuti panyake ndiyo watora thupi la Yesu. Ntheura wakati: ‘Usange ndiwe wamufumyamo niphalira.’ Kweni mwanalume yura wakaŵa Yesu. Wakaŵa na thupi linyake ilo Mariya wakatondeka kulimanya. Kweni wakati wamucema zina lake, Mariya wakamanya kuti ni Yesu. Mariya wakacimbira na kuphalira ŵasambiri wakati: “Ndawona Fumu!”

Pa nyengo yinyake zuŵa leneilo pera, apo ŵasambiri ŵaŵiri ŵakalutanga ku Emausi, mwanalume munyake wakalongozgana nawo. Ŵasambiri ŵara ŵakaŵa ŵacitima comene cifukwa ca kukomeka kwa Yesu. Kweni peneapo ŵakendanga, mwanalume yura wakamba kulongosora vinthu vinandi vya mu Baibolo ivyo vikaŵapembuzga. Paumaliro pake, ŵakati ŵakhala pasi kuti ŵarye cakurya, ŵasambiri ŵara ŵakamanya kuti mwanalume yura wakaŵa Yesu. Penepapo Yesu wakazgeŵa, ndipo ŵasambiri ŵaŵiri ŵara mwaluŵiro ŵakaluta ku Yerusalemu kuti ŵakaphalire ŵapositole za iyo.

Peneapo ivi vikacitikanga, Yesu wakawonekera kwa Petrosi. Ŵasambiri ŵanyake ŵakakondwa ŵakati ŵapulika ivi. Ŵasambiri ŵaŵiri ŵara ŵakaluta ku Yerusalemu ndipo ŵakasanga ŵapositole. Ŵakaŵaphalira umo Yesu wakawonekera kwa iwo mu msewu. Ndipo ŵacali kuyowoya za ici, kasi ukumanya cinthu cakuziziswa ico cikacitika?

Laŵiska pa cithuzithuzi. Yesu wakawonekera mu cipinda umo ŵakaŵa, nangauli ku muryango kukaŵa kwakukiya. Mwee, naco nchimwemwe ico ŵasambiri ŵakaŵa naco! Kasi ici nchakukondweska yayi? Kasi ungapenda kuti Yesu wakawonekera kalinga ku ŵasambiri ŵake kufika pa nyengo iyi? Kasi wapenda kankhondi?

Mpositole Tomasi wakaŵa nawo yayi apo Yesu wakawonekera kwa iwo. Ntheura ŵasambiri ŵakamuphalira kuti: “Tawona Fumu!” Kweni Tomasi wakayowoya kuti wangagomezga yayi kwambura kumuwona. Mazuŵa ghankhondi ghakati ghalutapo, ŵasambiri ŵakaŵaso pamoza mu cipinda cakukiya, ndipo pa nyengo iyi Tomasi wakaŵapo. Mwamabuci, Yesu wakawonekera mu cipinda ico ŵakaŵa. Pa nyengo iyi Tomasi wakagomezga.