ПЁТР биле Иоа́нн ооң мурнунда Иисустуң мага-боду чыткан чевегден чоруптарга, Мария чааскаан артып калган. Ол ыглап турар. Ооң соонда, баштайгы чурукта көргүскени ышкаш, ол доңгайгаш чевегже бакылап турар. Оон аңаа дээрниң ийи төлээзин көрүп каан! ‘Чүге ыглап тур сен?’ — деп, олар оон айтырган.

— Мээң Дээргимни аппарган, кайнаар алганын билбес-тир мен,— деп, Мария харыылаан. Оон ол эргилип келгеш, бир-ле кижини көрүп каан. ‘Кымны дилеп чор сен?’ — деп, ол кижи айтырган.

Мария ол кижини сад ажаакчызы кылдыр көргеш, Иисустуң мага-бодун ол ап алган боор деп бодаан. Ынчангаш оон дилээн: ‘Мага-ботту сен аппарган болзуңза, кайдазын айтып берем’. Херек кырында ол Иисус-тур. Ол өске мага-боттуг боорга, Мария ону танываан. Кажан ол ооң адын адаптарга, Мария ону Иисус деп билип каан. Ол өөреникчилерге халып баргаш: ‘Мен Дээргини көрдүм!’ — деп дыңнаткан.

Ол-ла хүн ийи өөреникчи Еммаус деп суурже бар чорда, бир кижи таварышкан. Иисустуң өлгени дээш өөреникчилери дыка муңгаргай чорааннар. Ынчалза-даа оларга орук дургаар ол кижи Библиядан хөйнү тайылбырлап бээрге, оларга чиик апарган. Өөреникчилер чемненип алыр дээш доктаапкаш, ол кижи Иисус деп танып кааннар. Ынчан Иисус чиде берген, а өөреникчилер ол дугайын апостолдарга дыңнадыр дээш, Иерусали́мче дедир халып чорупканнар.

Ол үеде Иисус Пётрга база көзүлген. Ооң дугайында арткан өөреникчилер база билип кааш, дыка амыраан. Ооң соонда ол ийи өөреникчи Иерусали́мге келгеш, апостолдарны тып алган. Олар база орукка Иисуска таварышканын дыңнатканнар. Ооң дугайында чугаалап турда, таптыг-ла ол үеде чүү болганыл, билир сен бе?

Чурукту көрем. Эжик дээктиг-даа болза, өрээлге Иисус тыптып келген. Ол дээш өөреникчилер кайы-хире өөренил! Ол дээрге сагыш-сеткилди доюлдуруптар хүн эвес-тир бе? Санап көрем, Иисус өөреникчилеринге каш катап көзүлген-дир? Санаарыңга беш-тир бе?

Иисус өөреникчилеринге көстүп турда, оларның аразынга апостол Фома́ турбаан. Ынчангаш өөреникчилер аңаа соонда чугаалап берген: ‘Бис Дээргини көрдүвүс!’. Ынчалзажок Фома́, Иисусту бодунуң караа-биле көрбээн шаанда бүзүревес мен дээн. Оон сес хонганда өөреникчилер бир өрээлге катап чыглып тургаш эжикти дээктеп алганнар, ынчан оларның аразында Фома́ турган. Хенертен өрээлге Иисус тыптып келген. Ам Фома́ база бүзүрей берген.