PAGBAYA nira Pedro ngan Juan ha lubnganan ni Jesus, nag-usahan na la hi Maria ngan nagtangis hiya. Katapos, dinuko hiya ngan ginhiling an sulod han lubnganan, sugad han aton nakita ha retrato ha nauna nga istorya. Didto nakita niya an duha nga anghel! Nagpakiana hira ha iya: ‘Kay ano nga nagtatangis ka?’

Hi Maria binaton: ‘Ginkuha nira an akon Ginoo, ngan diri ako maaram kon diin hiya iginbutang.’ Katapos liningi hi Maria ngan nakita niya an usa nga lalaki. Nagpakiana ha iya an lalaki: ‘Hin-o an imo ginbibiling?’

Kahuna ni Maria nga hardinero an lalaki, ngan bangin hiya an nagkuha han lawas ni Jesus. Salit siniring hi Maria: ‘Kon imo hiya ginkuha, sumati ako kon diin mo hiya iginbutang.’ Kondi ha tinuod la, ini nga lalaki amo hi Jesus. Nagsul-ot hiya hin lawas nga waray makilala ni Maria. Han gintawag niya hi Maria ha ngaran, nakilala ni Maria nga hi Jesus ito. Dinalagan hiya basi sumatan an mga disipulo: ‘Nakita ko an Ginoo!’

Hito nga adlaw, samtang nagbabaktas ngadto ha baryo han Emaus an duha nga disipulo, may-ada lalaki nga binunyog ha ira. Masurub-on gud an mga disipulo tungod kay ginpatay hi Jesus. Kondi samtang naglalakat hira, damu an iginsumat han lalaki tikang ha Biblia nga nakaliaw ha ira. Ngan han inundang hira basi mangaon, nakilala han mga disipulo nga ini nga lalaki amo hi Jesus. Katapos, nawara hi Jesus, ngan an duha nga disipulo nagdagmit pagbalik ha Jerusalem basi sumatan an mga apostol mahitungod ha iya.

Samtang nabalik an duha nga disipulo ha Jerusalem, nagpakita liwat hi Jesus kan Pedro. Nalipay an iba han hinbatian nira ini. Pag-abot han duha nga disipulo ha Jerusalem, hin-agian nira an mga apostol. Iginsumat nira nga nagpakita liwat ha ira hi Jesus ha dalan. Ngan samtang nag-iistorya hira, maaram ka ba kon ano an urusahon nga nahitabo?

Kitaa an retrato. Tigda nga nagpakita hi Jesus dinhi hini nga kwarto bisan kon nakatrangka ito. Nalipay hinduro an mga disipulo! Makalilipay gud ito nga adlaw, diri ba? Naihap mo ba kon pira ka beses nga nagpakita hi Jesus ha iya mga sumurunod? Lima ba ka beses?

Waray hi apostol Tomas han nagpakita hi Jesus ha ira. Salit ginsumatan hiya han mga disipulo: ‘Hinkit-an namon an Ginoo!’ Kondi nagsiring hi Tomas nga matoo la hiya kon makita niya mismo hi Jesus. Paglabay hin walo ka adlaw, nagkatirok na liwat an mga disipulo ha nakatrangka nga kwarto, ngan hini nga higayon kaupod nira hi Tomas. Tigda nga nagpakita hi Jesus ha ira dida hito nga kwarto. Yana tinuod na hi Tomas.