PATYOSILE Petulo ni Yohane ku lilembe lyaŵaŵisile mtembo wa Yesu, Maliya akusigala pelembepo jika. Jwalakwe akutanda kulila. Kaneko akwinama ni kulolecesyaga mkati mwa lilembe lila mpela mwatite kuyiwona paciwulili ca munyumamu. Mkati mwakwemo akugawona malayika gaŵili! Ni malayikago gakum’wusya kuti: ‘Ligongo cici mkulila?’

Maliya akwanga kuti: ‘Ambuje ŵangu ŵatyosisyemo, ni ngangumanyilila kuti ŵaŵisile kwapi.’ Kaneko Maliya pakugalawuka akum’wona mundu. Mundu jula akum’wusya kuti: ‘Ana mkulolesya cici?’

Maliya akuganisya kuti munduju ali jwakulima mumgunda, soni kuti komboleka jwalakwejo ajigele mtembo wa Yesu. Sambano Maliya akuŵeceta kuti: ‘Naga amjigele, asalile kwam’ŵisile.’ Nambo, jwakuŵeceta najojo ali Yesu jwene. Jwalakwe awete cilu cakuti Maliya ngaŵa mkucimanyilila. Nambo jwalakwe pakumkolanga lina lyakwe, Maliya sambano akumanyilila kuti ali Yesu. Jwalakwe akuwutuka nikwasalila ŵakulijiganya ŵakwe kuti: ‘Naweni Ambuje!’

Palisiku lilyolyo musi, ŵakulijiganya ŵaŵili ŵa Yesu pali paulendo wakwawula ku Emawo, mundu jwine akwasimana. Ŵakulijiganyawo cakamwile mnope canasa ligongo lyakuti Yesu am’wuleje. Nambo pakwenda, mundu jula akutagulila yindu yejinji ya m’Baibulo yayikwalimbikasya ŵakulijiganyawo. Pambesi pakwe pajimi kuti alye, ŵakulijiganya ŵala sambano akumanyilila kuti mundu jula ali Yesu. Kaneko Yesu ngakuwonekasoni. Sambano ŵakulijiganya ŵaŵiliŵa mwacitema akuwujilasoni ku Yelusalemu kukwasalila ŵandumetume pakwamba ya Yesu.

Payikutendekwa yeleyi, Yesu akuwonecelasoni kwa Petulo. Ŵakulijiganya ŵane pakupikana nganiji akusangalala. Akwasalilasoni mwaŵawonecele Yesu kwa jemanjajo paŵaliji mkwenda petala. Pakatema kakutagulilana yeleyi, ana akumanyilila cakusimonjesya cacikutendekwa?

Alole ciwilulici. Yesu akuwonecela mkati mwa cipinda, atamose kuti litanga lili lyewugale. Ŵakulijiganyawo ali ŵakusangalala mnope! Lyeleli lili lisiku lyakusangalasya. Ana mpaka aŵalanje ndaŵi syaŵele Yesu mkuwonecela kwa ŵakulijiganya ŵakwe? Ana sikwana ndaŵi msano?

Ndumetume Tomasi nganapagwapo Yesu paŵawonecelaga kwa ŵakulijiganya acimjakwewo. Sambano ŵakulijiganyawo akumsalila kuti: ‘M’weji twaweni Ambuje!’ Nambo Tomasi akuti cakulupilile yeleyi naga ali am’weni jika Yesu. Kaneko pali papite masiku 8 ŵakulijiganya ŵala alisoni m’cipinda cewugale, pandaŵiji Tomasi ali nawo yimpepe. Mwacisisimucila Yesu akuwonecela m’cipindamo. Ni sambano Tomasi akukulupilila.