GEDURENDE die dae daarna verskyn Jesus baie keer aan sy volgelinge. Eenkeer sien omtrent 500 van sy dissipels hom. Weet jy waaroor Jesus met hulle praat wanneer hy aan hulle verskyn? Die koninkryk van God. Jehovah het Jesus na die aarde toe gestuur om mense van die Koninkryk te leer. En hy hou aan om dit te doen selfs nadat hy uit die dode opgewek is.

Onthou jy wat God se koninkryk is? Ja, die Koninkryk is ’n regte regering van God in die hemel, en Jesus is die Een wat God gekies het om die koning te wees. Soos ons geleer het, het Jesus gewys wat ’n wonderlike koning hy sal wees deur vir honger mense kos te gee, siekes gesond te maak en selfs dooies op te wek!

Hoe sal dit dan op die aarde wees wanneer Jesus ’n duisend jaar lank as koning in die hemel regeer? Ja, die hele aarde sal ’n pragtige paradys gemaak word. Daar sal geen oorloë, misdaad, siekte of selfs dood meer wees nie. Ons weet dat dit waar is, want God het die aarde gemaak om ’n paradys te wees wat mense kon geniet. Dit is hoekom hy in die begin die tuin van Eden gemaak het. En Jesus sal sorg dat God se wil uiteindelik gedoen word.

Die tyd kom nou dat Jesus moet teruggaan hemel toe. Jesus het 40 dae lank aan sy dissipels verskyn. Daarom is hulle seker dat hy weer lewe. Maar voordat hy van sy dissipels af weggaan, sê hy vir hulle: ‘Bly in Jerusalem totdat julle heilige gees kry.’ Die heilige gees is God se werkende krag, soos wind wat waai, en dit sal sy volgelinge help om God se wil te doen. Heel laaste sê Jesus: ‘Julle moet tot in die mees afgeleë dele van die aarde oor my preek.’

Nadat Jesus dit gesê het, gebeur ’n verbasende ding. Hy begin in die lug opstyg, soos jy hier kan sien. Dan verdwyn hy agter ’n wolk, en die dissipels sien Jesus nie weer nie. Jesus gaan hemel toe, en hy begin om van daar af oor sy volgelinge op die aarde te regeer.