WALJA urunakaw saraqxäna, arkirinakapax walja kutiw Jesusar uñjxapxäna. Mä kutix 500 arkirinakapaw uñjapxäna. Jesusax uñstkäna ukapachaxa, ¿kuna tuqitsa parlirïpachäna? Diosan apnaqäwipatwa parlirïna. Jehová Diosax Apnaqäwipat parlañapatakiw Jesusarux aka Uraqir khitanïna. Jupax jiwatat jaktkasinsa uka tuqit parlaskakïnwa.

¿Kunas Diosan apnaqäwipax uk amttati? Alaxpachan uttʼayata Diosan gobiernopawa, ukat Jesusaw apnaqirïñapatak Ajllitaxa. ¡Kunjamtï uñjawayktanxa, Jesusax manqʼat awtjatanakarusa manqʼayänwa, usutanakarusa qullänwa, jiwatanakarus jaktayarakïnwa, ukham wali suma apnaqirïniw Jesusaxa!

Ukat kunapachatï alaxpachat waranq mara apnaqanini ukhaxa, ¿aka Uraqix kunjamänisa? Jïsa, aka Uraqpachaw mä suma kusipacharu tukuyatäni. Janiw jukʼampi chʼaxwañanakasa utjxaniti, ni jiwayasiñanakasa, ni usuntañanakasa, ni jiwañas utjxaniti. Ukxa yattanwa, kunattix Diosax aka Uraqxa suma kusipachäñapatakiw luratayna, jaqin jakasiñapataki. Ukatwa Edén huertxa luratayna. Diosax kuntï munkäna ukxa Jesusaw phuqayani.

Alaxpachar Jesusax kutkatxañapäna uka urux purinxänwa. 40 uruw Jesusax arkirinakapar uñstawayäna, taqiniw jakaskatapxa yatxapxäna. Ukampis janïr alaxpachar sarkasaxa akham sänwa: ‘Jerusalenan suyapxañamawa qullan ajayu katuqapxañamkama’ sasa. Qullan ajayux Diosan chʼamapawa, thayjamawa, ukaw arkirinakaparux Diosan munañap lurañxa yanaptʼañapäna. Tukuyaruxa Jesusax akham sänwa: ‘Jumanakax aka Uraqpachanwa nayat yatiyapxäta’ sasa.

Uk säna ukatsti, muspharkañaw pasäna. Jesusaw alaxpachar aptatäxäna, akan uñjaski ukhama. Ukatxa qinayaw imantxäna, arkirinakapax janiw ukat uñjxapxänti. Jesusax alaxpachar kutkatxasaxa, alaxpachatwa aka Uraqinkir arkirinakaparux apnaqäna.