MU KUYA kwa nshita, Yesu alimonekele ku basambi bakwe imiku iingi. Pa nshita imo abasambi nalimo 500 balimumwene. Bushe walishiba ifyo alelandapo ilyo alemonekela kuli bena? Alelanda pa bufumu bwa kwa Lesa. Yehova atumine Yesu ukwisashimikila pa Bufumu bwakwe. Kabili alitwalilile ukushimikila na lintu abuukile ku bafwa.

Nga uleibukisha, bushe ubufumu bwa kwa Lesa ni cinshi? Buteko bwa kwa Lesa ubwaba ku muulu, kabili Yesu eo Lesa asala ukuba imfumu. Nge fyo twasambilile, Yesu alilangile ukuti akaba imfumu isuma pantu akapeela abantu bonse ifya kulya, akaposha abalwele, kabili akabuusha na bafwa.

Bushe ifintu fikaba shani pe sonde ilyo Yesu akalateka mu myaka 1,000? Isonde lyonse likaba paradaise. Takwakabe inkondo, ukwipayana, ukulwala, nelyo imfwa. Tatutwishika pantu Lesa alefwaya isonde, umwa kwikala abantu likabe paradaise. E co apangiile icifulo icaleitwa ati Edeni. Kabili ilyo Yesu akalateka, akacita fyonse ifyo Lesa afwaya ukuti fikacitike.

Pa numa ya kumonekela ku basambi bakwe pa nshiku 40, Yesu alibwelelemo ku muulu. Kanshi balishininkishe ukuti aali no mweo na kabili. Lelo ilyo talaya ku muulu, aebele abasambi bakwe ati: ‘Mwikafuma mu Yerusalemu mpaka mukapokelele umupashi wa mushilo.’ Umupashi wa mushilo, maka ya kwa Lesa uwaba kwati mwela uulepuupa. Wali no kula-afwa abasambi bakwe ukucita ukufwaya kwa kwa Lesa. Na mu kulekelesha, Yesu abebele ati: ‘Mulingile ukushimikila abantu pali ine pano isonde ponse.’

Ilyo Yesu apwile fye ukulanda, kwalicitike icintu ca kupapusha. Atendeke ukwima no kuya mu muulu, nga fintu ulemona pa cikope. Lyena ikumbi lyalimufimbile, na basambi balilekele ukumumona. Yesu aile ku muulu no kutendeka ukuteka abasambi bakwe abashele pe sonde.