Abahüdaguni 104

Lagiribudun Hesusu sielun

SÜGÜTI fiú weyu, ani arufudaguati Hesusu lungua houn lánigu saragu wéiyaasu. Luagu aban ókaasion, ariha hamuti kéiburi 500 disipulugu. Dan burí le larufudagunbei lungua houn, subuditi san bun ka lan uagu ladimureha Hesusu houn? Luagu arúeihani le lani Bungiu. Óunaha lumuti Heowá Hesusu Ubouagun lun larufudahan luagu Arúeihani le. Ani sigiti adügei katei le íbini lárigiñe lásaaragüdüniwa hádangiñe hilaaña.

Haritaguabagili katei lan arúeihani lani Bungiu? Aban gumadi inarüniti lani Bungiu sielu, ani Hesusu lanúadirubei lun urúei lan. Kei le ariha wamali lubéi, arufuda lumuti Hesusu buidubei lan kei urúei dan le leigagüdüniña lamatiñu, lareidaguagüdüniña sánditiña, darí lun lásaaragüdün hilaaña!

Ligíati, danme le larúeihan Hesusu sielu luagu milu irumu, kaba san asusereda ya Ubouagu? Anha, ladügǘba sun Ubóu lun aban lubuidun paraísu houn gürigia. Úaalime wuribu, ni áfarahani, ni sandi, ni óunweni. Subudi wamuti ítara luba lan ladüga adüga lani meha Bungiu Ubóu paraísume houn gürigia. Ligía ladügünbalin fuluri-agei Edén. Hesusuba lau kárugu lun ladügǘn le labusenrubei Bungiu.

Chülühali dan lun lagiribudun Hesusu sielun. Arufudaguati lungua luagu 40 weyu houn disipulugu ani subudi hamuti winwan lan. Gama lumoun lubaragiñe lidin aba lariñagun houn: ‘Redei huma Herusalén darí hibihini sífiri sandu.’ Lubafu Bungiu sífiri sandu, ítara liña kei láfurun garabali, líderagubaña lánigu adügei lugundan Bungiu. Ábati lariñagun Hesusu: ‘Hapurichihaba nuagu chülǘ lumoun lidise-agei Ubóu.’

Lárigiñe lariñaguni katei le, susereti aban katei le aweiridagüdüti hanigi. Aba latatirun amudeira sielun, kei barihini ya. Ñéingiñe aba ladouragun aban dúeri lau, marihin hamaali disipulugu. Aba lidin Hesusu sielun, aba latatirun agumadiha siélugiñe hawagu lánigu ya Ubouagu.

1 Korintuna 15:3-8; Arufudúni 21:3, 4; Adügaü 1:1-11.