IBAMAR nanamai gude, geb balibali Jesús na eba nanamaladse oyodii gusa. Ibagwengi, 500 mergusaar eba nanamaladi, Jesús dagsamala. Sanar gunonigua, ¿be wisi ibugi Jesús wemarga sunmasa? Babdummad e reinogi. Jehová, Nabbanegse Jesús barmiali we Reinogi emar odurdaggega. Geb we ibmar imagdii gusa, anba burgwisad sorba, durgusgua.

¿Be ebinsae Babdummad e reino ibu obare? Wedi Babdummad e gobierno sunsogedi, nibneggi sii, geb Babdummad sogedba Jesús Onugsalesadi reyga sigega. ¡Bad anmar durdasa, Jesús rey nued guoe na oyosa, uggurba iddomalad oimmeresgua, degine, boni nigmalad nudasgua, geb anba burgwarmalad odulosbargua!

Degsoggu, Jesús birga miligwena nibneggi reyga negdagmai gude sogele, ¿be wisi igi Nabbaneg guoe? Bela Nabbaneg ugaggase neg yeerdaglegedga guoe. Bar neggweburmar nabo abinabin urwosurmala, bar negaggalomaladi nigguosuli, bar bonigan nigguosuli, geb dulemar bela, bar burgosurbali. Anmar wisi deyob ibmar guoe, ar Babdummadi dulemarga Nabbaneg imasgua, neg yeerdaglegedga gueg imasana. Agala Edén nasisana. Degsoggu Jesús, Babdummad ibmar abeged imagged segoe.

Emisgi ibamar owarmasa, Jesús nibnegse gannar naega. Geb 40 días na e sabbinganse oyodii gusa, geb wemardi wismala Jesús dula gudii. Auggine naed iduar emarga sogsa: ‘Jerusaléngi mer bangumalo, Bab e gangued bemarga barmidagedse’. Wedi Babdummad gangued e ibmar abeged imaggedgi ebuleged obare, burwa uboe yobi gue. We ganguedi eba nanamalad bendaggoedi, Babdummad ibmar abeged nabir imagmalaga. Nabbidgi, Jesús soggali: ‘Bela Nabbaneg ugagse bemar angi sunmagmaloed’.

Wegi sogsad sorba, Jesús nibnegse naggwide, sobarnaidgi be dagge yobi. E sabbingan geger daggarmalad. Sorbali, Jesús mogir yaba dogsa, geb bar dagsasurmala. Jesús nibnegse nade, geb agine, eba nanamalad Nabbaneggi gudimalad idumai guarsunna.