E VAKARAITAKI koya vakalevu o Jisu vei ira na nona imuri ena vica tale na siga emuri. Dua na gauna era raici koya kina e rauta ni 500 na tisaipeli. Ena gauna e rairai kina vei ira, o kila se cava e vakamacalataka vei ira? Na Matanitu ni Kalou. E talai Jisu mai vuravura o Jiova me vakatavuvulitaka na veika me baleta na Matanitu ni Kalou. Ni sa vakaturi mai na mate, e vakayacora tiko ga oqori o koya.

O se nanuma tiko se cava na matanitu ni Kalou? Io, oqori e dua dina na matanitu mai lomalagi, qai digitaki Jisu na Kalou me kena tui. Me vaka eda sa raica mai, sa vakadinadinataki koya oti o Jisu ni na tui uasivi ni a vakani ira na waloloi, vakabulai ira na tauvimate, kei ira sara mada ga era sa mate tu!

Sa na vakacava beka na bula e vuravura ni sa veiliutaki mai lomalagi o Jisu me dua na udolu na yabaki? Io, e sa na vuki o vuravura taucoko me parataisi totoka. Sa na oti vakadua na ivalu, ivakarau ca, tauvimate, kei na mate sara mada ga. Eda kila ni na yaco dina oqori, ni a bulia na Kalou na vuravura me parataisi meda bula marau kina na tamata. Oqori sara ga na inaki a bulia kina na were o Iteni mai na ivakatekivu. Ena qai raica o Jisu me vakayacori na ka e vinakata na Kalou me caka.

Sa kena gauna oqo me lesu i lomalagi o Jisu. E rauta ni 40 na siga nona rairai tiko vei ira nona tisaipeli. Era vakadinata ni sa bula tale. Ia ni bera ni biuti ira nona tisaipeli, e kaya vei ira o Jisu: ‘Dou tiko ga e Jerusalemi me yacova sara ni dou sa rawata na yalo tabu.’ Na yalo tabu, na igu yavavala ni Kalou, e vaka na liwa ni cagi, ena vukei ira na nona imuri mera cakava na loma ni Kalou. E kaya o Jisu: ‘Dou vunautaki au me yacova na iyalayala kei vuravura.’

Ni tukuna oti ga o Jisu na veika oqori, e yaco sara e dua na ka veivakurabuitaki. Sa tubu cake vakamalua i lomalagi, me vaka ga o raica tiko e ke. Sega ni dede, sa tabonaki koya na o, sa yali sara mai na matadra na tisaipeli. Sa lako i lomalagi o Jisu, qai tekivu liutaki ira mai na nona imuri era tiko e vuravura.