EEʼIYATAASHI Jesús namüin na nikirajüinkana kojuyatua. Soʼu wanee kaʼi neʼrüin nia 500 wayuu. Niiʼiyataapa Jesús, ¿pütüjaa aaʼu kasa naashajaaka achiki? Shia süchiki nuluwataaya Maleiwa. Nuluwataain Jeʼwaa Jesús Mmapaʼamüin süpüla nikirajüin süchiki tü Nuluwataayakat. Ayatüsü naainjüin Jesús tia süsoʼiraapa naaʼin.

¿Sotusü paaʼin kasa tü nuluwataayakat Maleiwa? Shia wanee aluwataaya chasü sirumatuʼu, nia Jesús sülaülaka. Niiʼiyatüin Jesús anainjachin maʼin nia nuluwataapa wanaa sümaa nikirüin na jamüsitkana, niiyajüin na ayuuishiikana otta nüsoʼireʼerüin naaʼin na ouktushiikana.

Nuluwataapa Jesús soʼu 1.000 juya chaaʼaya sirumatuʼu, ¿jamüinjatü tü Mmakat? Paraiisüinjatü. Nnojoleerü atkawaa, kaainjalaa, ayuulii jee ouktaa. Watüjaa aaʼu müinjatüin shia süka nukumajüin Maleiwa tü Mmakat süpüla paraiisüinjatüin shia. Makalaka nukumajüin Edén. Ekeraajeerü nutuma Jesús tü keeʼireekat naaʼin Maleiwa.

Aleʼejüinjachi Jesús sirumatuʼumüin. Eeʼiyataashi nia namüin na nikirajüinkana soʼu 40 kaʼi, natüjaa aaʼu katüin noʼu. Süpülapünaa nuʼunuin müshi nia namüin: ‹Nnojo juʼunuin Jerusalénjee jaʼatapaja chi naaʼinkai Maleiwa›. Tia shia tü nütchinkat Maleiwa, müsü aka saaʼin jouktai, akaaliinjeenaka na nikirajüinkana süpüla naainjüin tü keeʼireekat naaʼin Maleiwa. Mapa nümaka Jesús: ‹Aküjeena jia pütchi tachiki suluʼu Mma wattapünaa›.

Süchikijee nüküjüin tia, oʼunushi nia sirumatuʼumüin maʼaka piʼrüin suluʼu tü ayaakuaakat. Nnojoika nia neʼrüin na nikirajüinkana sutuma tü sirumakat. Nuʼunaka Jesús sirumatuʼumüin otta nuluwataaka naaʼu na nikirajüin yaakana Mmapaʼa.