NEGA ia hanaia lalonai, Iesu be nega momo ena murinai idia raka taudia dekenai ia hedinarai. Nega ta ena hahediba taudia 500 bamona ese ia idia itaia. Iesu be idia dekenai ia hedinarai negadiai, idia dekenai ia herevalaia gaudia oi diba, a? Dirava ena basileia. Iehova ese Iesu be tanobada dekenai ia siaia Basileia ia hadibaia totona. Bona ia toreisi lou murinai danu unai bamona ia karaia.

Dirava ena basileia ena anina oi laloatao, a? Oibe, Basileia be Dirava ena gavamani korikorina guba dekenai, bona Dirava ese Iesu ia abia hidi ia king totona. Ita dibaia bamona, Iesu ese hitolo taudia ia ubua, gorere taudia ia hanamoa bona mase taudia danu ia hamauria lou karana amo ia hahedinaraia ia be king namona ai do ia lao!

Unai dainai Iesu be guba dekenai lagani 1,000 lalonai ia lohia neganai, tanobada be edena bamona? Oibe, tanobada ibounai be paradaiso hairaina ai do ia lao. Tuari, taravatu utua karadia, gorere bona mase danu do idia ore. Ita diba unai be momokani badina Dirava ese tanobada ia karaia, taunimanima ese idia moalelaia paradaisona ai ia lao totona. Unai dainai matamanai Eden umana ia karaia. Bona Iesu ese Dirava ena ura ibounai do ia karaia guguru.

Iesu be guba dekenai ia giroa lou negana ia ginidae. Ia be dina 40 lalonai ena hahediba taudia dekenai ia hedinarai. Unai dainai idia diba ia mauri lou vadaeni. To ena hahediba taudia ia do rakatania lasi neganai, idia ia hamaoroa: ‘Ierusalema dekenai umui noho ela bona lauma helaga umui abia.’ Lauma helaga be Dirava ena gaukara siahuna, ia be lai bamona, unai ese ena murinai idia raka taudia ia durua Dirava ena ura idia karaia totona. Dokonai, Iesu ia gwau: ‘Lauegu sivarai umui harorolaia ela bona tanobada ena kahana ibounai.’

Iesu be unai ia gwauraia murinai, hoa gauna ta ia vara. Guba dekenai ia daekau lao matamaia, inai laulau dekenai oi itaia bamona. Bena ori ta ese ia koua dainai, hahediba taudia ese ia idia itaia lou lasi. Iesu be guba dekenai ia lao, bona tanobada ai ena murinai idia raka taudia ia lohiaia matamaia.