EPANỌ edẹ ebe rọ vrẹ na, Jesu o te dhesẹ oma riẹ kẹ ilele riẹ ẹsi buobu, ẹsiẹvo jọ ole ilele 500 a rue riẹ. Okenọ ọ rehọ oma via kae, kọ whọ riẹ oware nọ Jesu ọ ta ẹme te kae? Uvie Ọghẹnẹ na. Jihova o vi Jesu ze akpọ na re owuhrẹ kpahe Uvie na. Okenọ a kpariẹe no iwhowhu ze no dede yọ o gbe bi ru onana.

Kọ whọ kareghẹhọ oware nọ uvie Ọghẹnẹ orọ? E, Uvie na họ uzedhe isuẹsu Ọghẹnẹ nọ orọ obọ odhiwu, yọ Jesu họ Ọnọ Ọghẹnẹ ọ salọ re ọjọ ovie. Wọhọ epanọ ma wuhrẹ, Jesu ọ rehọ ẹkuọ enọ ohọwo ukpe, esiwo enọ emọ, tubọ jegbe iwhowhu ekpare ze uzuazọ ro dhesẹ oghẹrẹ ovie ogbunu nọ ọ rẹ te jọ!

Fikiere kọ okenọ Jesu ọ te jọ ovie su ikpe udhusoi akwakpe obọ odhiwu, kọ oghẹrẹ vẹ akpọ na ọ rẹ te jọ? Ẹhẹ, otọakpọ na kpobi a re ti rue’i zihe ro aparadase nọ o wo erru. Emo ifio egbẹ te jọ họ, hayo ugbarugba, hayo ẹyao, hayo uwhu dede. Ma riẹ nọ onana uzẹme keme na Ọghẹnẹ ọma otọakpọ na re ọ jọ aparadase nọ ọ rẹ were ahwo oma. Oye jabọ nọ ọ jẹ ma ogege Idẹn evaọ emuhọ. Yọ ukuhọ riẹ Jesu ọ rẹ te ruẹ nọ oware nọ Ọghẹnẹ ọ gwọlọ nọ a ru arurie.

Enẹna oke u te no nọ Jesu o re ro zihe kpobọ odhiwu. Anwọ edẹ 40 Jesu o bi ro dhesẹ oma riẹ kẹ ilele riẹ. Fikiere u te mua’e ẹro nọ ọzoma rọ uzuazọ no. Rekọ tao re ọ tẹ nya se ilele riẹ ba ọ tẹ ta kae nọ: ‘Wha jọ evaọ Jerusalem bẹse nọ ẹzi ọfuafo o te owhai obọ.’ Ẹzi ọfuafo na yọ ogaga iruo Ọghẹnẹ, wọhọ ofou nọ o bi fou, nọ o re fiobọhọ kẹ ilele riẹ ru oreva Ọghẹnẹ. Ukuhọ riẹ, Jesu ọ tẹ ta nọ: ‘Wha nyae vuẹ kpahe omẹ rri te oka vievie akpọ na.’

Nọ Jesu ọ ta onana no, oware ugbunu otẹ via. O te mu ehru họ ẹnya kpohọ obọ odhiwu, epanọ whọ rẹ ruẹ etenẹ na. Kẹsena ẹgho ọ tẹ kuẹi dhere no aro rai, ilele na a gbẹ ruẹ Jesu ofa ha. Jesu o te kpobọ odhiwu, o te mu ilele riẹ nọ erọ otọakpọ họ esu no obei tha.