TAQSIṬ TIS 104

Ɛisa yuɣal s igenni

AṬAS n tikkal daɣen i d-​ibeggen Ɛisa iman-​is i inelmaden-​is. Deg yiwet n teswiɛt, akteṛ n 500 n inelmaden i t-​iwalan. Teẓriḍ ɣef wacu i sen-​d-​iţmeslay Ɛisa? Ɣef Tgelda n Ṛebbi. Yahwa iceggeɛ-​ed Ɛisa ɣef lqaɛa iwakken ad isɣer lɣaci ɣef leḥwayeǧ yeɛnan Tagelda-​yagi. D ayen i gexdem ula d asmi i d-​yeḥya si ger lmeggtin.

Tecfiḍ d acu i ţ-​ţagelda n Ṛebbi? D lḥukuma n Ṛebbi yellan s ṣṣeḥ deg igenni. Ṛebbi yextaṛ Ɛisa iwakken ad yuɣal d Agellid n lḥukuma-​yagi. Akken i t-​nwala yakan, Ɛisa yessečč wid yelluẓen, yesseḥla wid yuḍnen yerna yeḥya-​d ula d wid yemmuten. S lecɣal-​agi ibeggen-​ed belli ad yili d agellid yifen akk wiyaḍ!

Amek ara tuɣal lqaɛa asm’ara yeḥkem Ɛisa deg igenni alef iseggasen? Lqaɛa meṛṛa aţ-​ţuɣal d lǧennet. Ur teţţili lgirra, ur yeţţili imenɣi, ur yeţţili lehlak, ula d lmut aţ-​ţeţwakkes. Netḥeqqeq s wannect-​a axaṭer Ṛebbi ixleq-​ed lqaɛa akken aţ-​ţuɣal d lǧennet i sseɛd n yemdanen. Ɣef wayagi i d-​yexleq di tazwara leǧnan n Ɛidin. Ɛisa ad ixdem kullec iwakken ad yeḍru lebɣi n Ṛebbi ɣef lqaɛa.

Ṛebɛin n wussan Ɛisa iţbeggin-​ed iman-​is i inelmaden-​is. Annect-​a iḍmen-​iten belli yeḥya-​d si ger lmeggtin. Tura yewweḍ-​ed lawan ad yuɣal s igenni. Lameɛna uqbel ad yemfaraq yid-​sen, yenna-​yasen: ‘Qqimet di temdint n Yarucalim alamma yers-​ed fell-​awen ṛṛuḥ iqedsen.’ Ṛṛuḥ iqedsen ţ-​ţazmert issexdam Ṛebbi akken ad issiweḍ lebɣi-​s. Ţ-​ţazmert-​agi, icuban aḍu iţsuḍen, ara iɛiwnen inelmaden ad xedmen lebɣi n Ṛebbi. Ɣer taggara, Ɛisa yumeṛ-​asen: ‘Ṛuḥet tberrḥem fell-​i di ddunit meṛṛa.’

Mi gfukk ameslay, teḍra-​d yiwet n lḥaǧa yessewhamen. Ɛisa yuli s igenni, akken i t-​teţwaliḍ di ţţeswiṛa-​ya. Yiwet n tagut tɣumm-​it, dɣa iɣab ɣef wallen n inelmaden-​is. Dayen ur ţţuɣalen ara a t-​walin. Ɛisa iṛuḥ s igenni, yebda iḥekkem-​ed syenna ɣef inelmaden-​is yellan di lqaɛa.

1 At Kurintus 15:3-8; Aweḥḥi 21:3, 4; Lecɣal 1:1-11.