NAABʼAL sut kixkʼutbʼesi ribʼ li Jesus chiruhebʼ li xtzolom. Abʼan jun sut ajwiʼ kixkʼut ribʼ chiruhebʼ 500 chi tzolom. Ma nakaanaw, kʼaru kixye rehebʼ? Li Jesus kiʼaatinak chirix li Xnimajwal Awabʼejilal li Yos. Li Jehobʼa kixtaqla li Jesus saʼ Ruuchichʼochʼ re naq tkʼutuq chirix li Xʼawabʼejilal li Yos. Joʼkan naq inkʼaʼ kixkanabʼ xbʼaanunkil. Ut toj kixbʼaanu naq kiwakliik wiʼ chik chi yoʼyo.

Kʼaru li Nimajwal Awabʼejilal chirix li kiʼaatinak li Jesus? Aʼan li Xʼawabʼejilal li Yos ut wank saʼ choxa. Li Yos kixsikʼ li Jesus re naq aʼan t-awabʼejinq saʼ li Xʼawabʼejilal. Naq li Jesus kiwank saʼ Ruuchichʼochʼ kixkʼutbʼesi chanru t-awabʼejinq saʼ li kutan chaalel. Tixchʼoolanihebʼ li qas qiitzʼin, tixkʼirtasihebʼ li yaj ut tixwaklesihebʼ wiʼ chik chi yoʼyo ebʼ li kamenaq.

Kʼaru tkʼulmanq saʼ li Ruuchichʼochʼ naq li Jesus t-awabʼejinq chiru li jun mil chihabʼ? Chixjunil li Ruuchichʼochʼ twulaq choʼq Sahilal Naʼajej. Maakʼaʼaq chik li nimla yalok u, li kamsink, li yajel chi moko li kamk. Naqanaw aʼin, xbʼaan naq li Yos kixyiibʼ saʼ li Ruuchichʼochʼ, li Eden, re naq ebʼ li qas qiitzʼin teʼwanq aran. Li Jesus tixbʼaanu li naraj li Jehobʼa.

Chiru 40 kutan kixkʼut ribʼ li Jesus chiruhebʼ li xtzolom re naq teʼxnaw naq yoʼyo. Xbʼaan naq wulak re xqʼehil naq tsutqʼiiq saʼ choxa. Ak xik re li Jesus saʼ choxa naq kixye rehebʼ li xtzolom: ‹Mexʼelk saʼ li tenamit Jerusalen toj naq teekʼul li santil musiqʼej›. Kʼaru li santil musiqʼej? Aʼan li xmetzʼew li Yos ut chanchan iqʼ. Aʼan naroksi li Yos re xtenqʼankilebʼ li xtzolom li Jesus re naq teʼxbʼaanu li Rajom. Chirix chik aʼan li Jesus kixye rehebʼ: ‹Teepuktesi li yaal chiwix toj saʼ xmaril li Ruuchichʼochʼ›.

Kʼaru kikʼulmank naq kiraqeʼk xyeebʼal aʼin? Li Jesus kiʼok chi taqeʼk saʼ choxa joʼ nakʼutunk saʼ li eetalil. Naq jun li choql kimuquk re, ebʼ li xtzolom inkʼaʼ chik keʼru chi rilbʼal. Saʼ choxa wank li Jesus naq kiʼok chi awabʼejink saʼ xbʼeenebʼ li xtzolom arin saʼ li Ruuchichʼochʼ.