MATUKŨ mahĩtũkanga-rĩ, Jesu nĩ eyonanirie kũrĩ arũmĩrĩri ake maita maingĩ. Hĩndĩ ĩmwe ta arutwo 500 me hamwe nĩ maamuonire. Rĩrĩa aamoimĩrĩire-rĩ, nĩ ũũĩ ũhoro ũrĩa Jesu aamaheire? Nĩ ũthamaki wa Ngai. Jehova aatũmĩte Jesu gũkũ thĩ arutane ũhoro wa Ũthamaki. Na aathire na mbere kũrutana ũguo o na thutha wa kũriũkio kuuma kũrĩ akuũ.

Nĩ ũraririkana ũthamaki wa Ngai nĩ kĩĩ? Ĩĩni, Ũthamaki nĩ thirikari ya biũ ya Ngai ya igũrũ, na Jesu Nĩwe ũthurĩtwo nĩ Ngai gũtuĩka mũthamaki. O ta ũrĩa tũrĩkĩtie kwĩruta-rĩ, Jesu nĩonanirie ũrĩa agatuĩka mũthamaki wa magegania na ũndũ wa kũhũnia arĩa ahũtu, kũhonia arũaru, o na ningĩ kũriũkia akuũ!

Nĩ ũndũ ũcio rĩrĩa Jesu agaathana e mũthamaki igũrũ ihinda rĩa mĩaka ngiri ĩmwe-rĩ, gũgakorũo kũhaana atĩa gũkũ thĩ? Ĩĩni tiguo, thĩ yothe ĩgathondekwo ĩtuĩke paradiso thaka mũno. Gũtigakorũo mbaara rĩngĩ, ũgeri ngero, kana mĩrimũ, o na kana gĩkuũ. Nĩ tũũĩ ũguo nĩguo tondũ Ngai ombĩte thĩ ĩtuĩke paradiso ya gũkenagĩrũo nĩ andũ. Kĩu nĩkĩo gĩatũmire athondeke mũgũnda wa Edeni o hau kĩambĩrĩria. Na Jesu nĩarĩona atĩ ũrĩa Ngai aabangĩte wĩkwo mũthia-inĩ nĩ ũrĩhingio.

Rĩu ihinda nĩrĩakinyire rĩa Jesu gũcoka igũrũ matu-inĩ. Ihinda-inĩ rĩa matukũ 40 Jesu nĩ akoretwo akĩyonania kũrĩ arutwo ake. Nĩ ũndũ ũcio rĩu me na ma atĩ e muoyo. No ĩndĩ atanatiga arutwo ake aamerire atĩrĩ: ‘Ikarai thĩinĩ wa Jerusalemu o nginya rĩrĩa mũkamũkĩra roho mũtheru.’ Roho mũtheru nĩ hinya wa Ngai, ta ũrĩa rũhuho rũhurutanaga, nĩ wa gũteithia arũmĩrĩri ake meke wendo wa Ngai. Mũthia-inĩ Jesu oigire ũũ: ‘Mũkũhunjia ũhoro wakwa o na nginya ituri ciothe cia thĩ.’

Jesu aarĩkia kuuga ũguo-rĩ, ũndũ wa magegania mũno ũgĩkĩka. Akĩambĩrĩria kũhaica igũrũ, o ta ũrĩa ũrona haha. Rĩu akĩhithwo nĩ matu, na arutwo matiigana kũmuona rĩngĩ. Rĩu Jesu agĩcoka igũrũ, na e kũu akĩambĩrĩria gũthamakĩra arũmĩrĩri ake gũkũ thĩ.