BYO papichile moba, Yesu wamwekele ku baana banji ba bwanga bimye byavula bingi. Kabiji kimye kimo baana banji ba bwanga 500 bamumwene. Yesu byo amwekele kwi abo, nanchi wayuka byo ebambijile nyi? Wibambijile pa bufumu bwa Lesa. Yehoba watumine Yesu panopantanda na kufunjisha pa mambo a Bufumu. Kabiji watwajijile na kwamba pa bufumu ne panyuma ya kusangulwa mu bafu.

Nanchi bufumu bwa Lesa wibuyuka nyi? Ee, Bufumu ke kafulumende wa kine kine wa kwa Lesa mwiulu, kabiji Yesu ye ye batongola kwi Lesa kwikala mfumu. Byonka byo twafunda kala, Yesu wamwesheshe byo akekala mfumu wawama kupichila mu byo ajishishe bajinga na nzala, kubuka bakolelwenga, ne kusangula bafu!

Onkao mambo, Yesu byo akalama mu bufumu bwa mwiulu pa myaka kiumbi kimo, panopantanda pakekala byepi? Ee, panopantanda ponse pakekala ke paladisa. Kechi kukekala makondo, bumbanzhi, kubela nangwa kufwa ne. Twayuka amba kino kya kine, mambo Lesa walengele ntanda kwikala ke paladisa kuba’mba bantu beyowenga. O ene mambo o anengezhejile bujimi bwa Edena ku ntendekelo. Kabiji Yesu ukoba byonse Lesa byo akeba’mba bikobiwe.

Pano kimye kyafikile kuba’mba Yesu abwele mwiulu. Yesu wamwekelenga ku baana banji ba bwanga pa moba 40. Pano baishile kuyuka’mba kya kine Yesu wasangulwa. Bino saka akyangye kusha baana banji ba bwanga, wibalayile’mba: ‘Kechi mufume mu Yelusalema ne, mupembele mukatambule mupashi wazhila.’ Mupashi wazhila ke bulume bwa Lesa, buji byonka bipupa mwela. Uno mupashi wazhila ye wakwashishe baana ba bwanga ba kwa Yesu kuba kyaswa muchima wa Lesa. Kyapeleleko, Yesu waambile’mba: ‘Mukasapwile pe amiwa ne monse mwapela ntanda.’

Yesu byo apwishishe kwamba bino byambo, kwamwekele kintu kya kukumya. Watendekele kuya mwiulu byonka byo ubena kumona pa kikye kipikichala. Kepo jikumbi jamuvwetele waleka ne kumwekana, kabiji baana banji ba bwanga balekele kumumona. Yesu wayile mwiulu, kabiji watendekele kulama baana banji ba bwanga bajinga panopantanda kufuma kyokya kimye.