AS TƐM de go, Jizɔs kɔntinyu fɔ apia to in disaypul dɛn. Wan tɛm, na lɛk 500 pan in disaypul dɛn si am. We i apia to dɛn, yu no wetin Jizɔs tɔk bɔt? I tɔk bɔt Gɔd in kiŋdɔm. Jiova sɛn Jizɔs na di wɔl fɔ kam tich pipul dɛn bɔt di kiŋdɔm. Ɛn Jizɔs kɔntinyu fɔ tɔk bɔt Gɔd in kiŋdɔm ivin we i dɔn gɛt layf bak.

Yu mɛmba wetin na Gɔd in kiŋdɔm? Na Gɔd in gɔvmɛnt we de na ɛvin. Na Jizɔs Gɔd dɔn pik fɔ bi di kiŋ. Wi bin dɔn lan bɔt aw Jizɔs sho se i go bi gud kiŋ. I bin de fid di wan dɛn we angri, mɛn di wan dɛn we sik, ɛn gi layf bak to di wan dɛn we bin dɔn day.

Aw yu tink se di wɔl go tan lɛk we Jizɔs go de rul na ɛvin fɔ wan tawzin ia? Di wan ol wɔl go bi Paradays. Da tɛm de, wɔ nɔ go de igen, pipul dɛn nɔ go de brok lɔ igen, nɔbɔdi nɔ go sik igen, ɛn day sɛf nɔ go de igen. Wi biliv se dis go apin bikɔs Gɔd bin want mek di wɔl bi Paradays, so dat mɔtalman go ɛnjɔy fɔ de de. Na dat mek i bin mek di gadin we bin de na Idɛn. Ɛn Jizɔs go mek shɔ se ɔl wetin Gɔd want, bi.

Naw, di tɛm dɔn rich fɔ lɛ Jizɔs go na ɛvin. Jizɔs bin dɔn de apia to in disaypul dɛn fɔ 40 dez. So dɛn dɔn biliv se i dɔn gɛt layf bak. Bɔt bifo Jizɔs go na ɛvin, i tɛl in disaypul dɛn se: ‘Una nɔ fɔ kɔmɔt na Jerusɛlɛm, una fɔ wet de te di oli spirit kam pan una.’ Di oli spirit na di pawa we Gɔd de yuz fɔ du ɛnitin we i want. I tan lɛk briz. Na dis spirit ya go ɛp Jizɔs in disaypul dɛn fɔ du wetin Gɔd want. Jizɔs tɛl dɛn bak se: ‘Una fɔ prich bɔt mi ɔlsay na di wɔl.’

We Jizɔs tɔk dɔn, wan wɔndaful tin apin. Jizɔs bigin fɔ go ɔp na ɛvin, jɔs lɛk aw yu de si na di pikchɔ. I go ɔp te na de i lɔs na di klawd, ɛn in disaypul dɛn nɔ si am igen. Jizɔs go na ɛvin, ɛn i bigin fɔ rul di wan dɛn we bin de fala am.