ပူ ၁၀၄
ယ့ၣ်ၡူးက့ၤထီၣ်ဆူမူခိၣ် အဂ့ၢ်
ဒ်မုၢ်နံၤတဖၣ်လဲၤပူၤကွံာ်အသိးန့ၣ် ယ့ၣ်ၡူးလီၣ်ဖျါထီၣ်အသးလၢ ပှၤပိာ်အခံတဖၣ် ခဲအံၤခဲအံၤန့ၣ်လီၤ. ဘၣ်တဘျီန့ၣ် အပျဲၢ် ၅၀၀ ထံၣ်ဘၣ်အီၤတဘျီဃီန့ၣ်လီၤ. ယ့ၣ်ၡူးန့ၣ် ဖဲအလီၣ်ဖျါထီၣ်အသးလၢ အဝဲသ့ၣ်အမဲာ်ညါဒ်န့ၣ်အခါ စံးဘၣ်အဝဲသ့ၣ်မနုၤအဂ့ၢ်လဲၣ် သုသ့ၣ်ညါဧါ. ကစၢ်ယွၤအမူခိၣ်ဘီမုၢ်အဂ့ၢ်န့ၣ်လီၤ. ယွၤမၢလီၤယ့ၣ်ၡူးဆူဟီၣ်ခိၣ် လၢကသိၣ်လိနဲၣ်လိဝဲ ယွၤအဘီမုၢ်အဂ့ၢ်န့ၣ်လီၤ. လၢအသံဝံၤ မူထီၣ်က့ၤဝဲအလီၢ်ခံဒၣ်လဲာ် ယ့ၣ်ၡူးသိၣ်လိဝဲတၢ်ဂ့ၢ်အံၤန့ၣ်လီၤ.
ယွၤအဘီအမုၢ်မ့ၢ်မနုၤလဲၣ်န့ၣ် သုသ့ၣ်နီၣ်ဒံးဧါ. မ့ၢ်လီၤ, ဘီမုၢ်အံၤမ့ၢ် ယွၤလၢအအိၣ်လၢမူခိၣ် အတၢ်ပၢတၢ်ပြး ပဒိၣ်နီၢ်နီၢ်န့ၣ်လီၤ. ဒီးယ့ၣ်ၡူးန့ၣ် မ့ၢ်ပှၤတဂၤဧိၤ လၢကစၢ်ယွၤဃုထၢပာ်ထီၣ်အီၤ ဒ်အစီၤပၤန့ၣ်လီၤ. ဒ်ပသ့ၣ်ညါတ့ၢ်ပဝဲအသိး ယ့ၣ်ၡူးဒုးအီၣ်ဒုးအီ ပှၤလၢအသၣ်ဝံၤသၣ်စ့ၤတဖၣ်, မၤဘျါန့ၢ်ဝဲ ပှၤအိၣ်ဆူးအိၣ်ဆါတဖၣ်, ဒီးပှၤလၢအသံတဖၣ်ဒၣ်လဲာ် မၤမူထီၣ်က့ၤဝဲလီၤ. ဒ်န့ၣ်ဒီး ပာ်ဖျါထီၣ်ဝဲဒၣ်လၢ အဝဲကမ့ၢ်စီၤပၤလၢ အဂ့ၤဒိၣ်မးန့ၣ်လီၤ.
လၢတၢ်န့ၣ်အဃိ ယ့ၣ်ၡူးမ့ၢ်ပၢတၢ်လၢမူခိၣ် အနံၣ်တကထိအခါ လၢဟီၣ်ခိၣ်ချၢန့ၣ် တၢ်ကမၤအသးဒ်လဲၣ်. မ့ၢ်လီၤ, ဟီၣ်ခိၣ်ဒီဘ့ၣ်ညါ ကကဲထီၣ် ပၤရဒံစူးအဃံအလၤတခါန့ၣ်လီၤ. တၢ်ဒုးတၢ်ယၤမ့ၢ်ဂ့ၤ, တၢ်အၢတၢ်သီမ့ၢ်ဂ့ၤ, တၢ်ဆူးတၢ်ဆါမ့ၢ်ဂ့ၤ တမ့ၢ်ကအိၣ်လၢၤဘၣ်. တၢ်သံဒၣ်လဲာ် တအိၣ်လၢၤဘၣ်. ပသ့ၣ်ညါလၢ တၢ်အံၤကဟဲကဲထီၣ် သပှၢ်ကတၢၢ်လီၤ. ဘၣ်မနုၤအဃိလဲၣ်န့ၣ် မ့ၢ်လၢ ယွၤတ့လီၤဟီၣ်ခိၣ်အံၤလၢ ကကဲထီၣ်ပၤရဒံစူး, ဒ်သိးပှၤဟီၣ်ခိၣ်ဖိ ကအိၣ်ဘၣ် မုာ်မုာ်ခုၣ်ခုၣ်အဂီၢ်န့ၣ်လီၤ. လၢတၢ်န့ၣ်အဃိ လၢအခီၣ်ထံးလံၤလံၤန့ၣ် တ့လီၤတ့ၢ်ဝဲ ဧ့ၤဒ့ၣ်တၤသၣ်အလီၢ် န့ၣ်လီၤသၢၣ်. ဒ်ယွၤသးအိၣ်ကဲထီၣ်အသိး ကဟဲကဲထီၣ်ဝဲအဂီၢ် ယ့ၣ်ၡူးကကွၢ်သုးကျဲၤဒီးမၤအီၤန့ၣ်လီၤ.
ခဲအံၤ တၢ်ဆၢကတီၢ်ဘၣ်လၢ ယ့ၣ်ၡူးကက့ၤထီၣ်ဆူမူခိၣ်လံ. လၢအပျဲၢ်အဘီၣ်တဖၣ်အမဲာ်ညါန့ၣ် လီၢ်ဖျါထီၣ်တ့ၢ်အသးအိၣ်ဝဲ အသီ ၄၀ လံန့ၣ်လီၤ. လၢတၢ်အံၤအဃိ အပျဲၢ်အဘီၣ်တဖၣ် နာ်ဝဲသ့ၣ်လၢ ယ့ၣ်ၡူးမူက့ၤကဒီးလံန့ၣ် သပှၢ်ကတၢၢ်လီၤ. သနာ်က့ ဖဲတချုးဟးဖးဒီးအပျဲၢ်အဘီၣ်တဖၣ်န့ၣ် မၤလိာ်တ့ၢ်အဝဲသ့ၣ်လၢ ‘တချုးသုဒိးန့ၢ်သးစီဆှံဒံးဘၣ်န့ၣ် အိၣ်ဒၣ်ဖဲ ယရူၤၡလ့ၣ်န့ၣ်တက့ၢ်’ န့ၣ်လီၤ. သးစီဆှံစံးတၢ်န့ၣ် မ့ၢ်ယွၤအစိကမီၤအတဟီၣ်န့ၣ်လီၤ. မၤသးဒ်သိး ကလံၤလၢအအူတၢ်ဒီး ကမၤစၢၤယ့ၣ်ၡူးအပျဲၢ်တဖၣ် ဖဲအစိာ်ထီၣ်ဒီးမၤဝဲ ယွၤအတၢ်မၤအခါန့ၣ်လီၤ. လၢခံကတၢၢ်, ယ့ၣ်ၡူးမၤလိာ်တ့ၢ်အီၤလၢ ‘သုကဘၣ်စံၣ်တဲၤတဲလီၤယဂ့ၢ် တုၤလၢဟီၣ်ခိၣ်အကတၢၢ်’ န့ၣ်လီၤ.
ယ့ၣ်ၡူးကတိၤတၢ်ဒ်အံၤဝံၤဒီး တၢ်လီၤလးတခါဟဲကဲထီၣ်န့ၣ်လီၤ. ဒ်အဖျါလၢတၢ်ဂီၤပူအံၤအသိး က့ၤထီၣ်က့ၤဝဲဆူ မူခိၣ်န့ၣ်လီၤ. ဝံၤဒီး တၢ်အၢၣ်ပာ်တဒၢကွံာ်အီၤလီၤ. ယ့ၣ်ၡူးန့ၣ်က့ၤထီၤဆူမူခိၣ်ဝံၤ စးထီၣ်ပၢတၢ်လၢ အပျဲၢ်အဘီၣ်တဖၣ် လၢအပိာ်အခံသ့ၣ်တဖၣ်အဖီခိၣ်န့ၣ်လီၤ.
