YESU nkumbu miayingi kamoneka kw’alongoki andi. Lumbu kimosi wamoneka kwa 500 z’alongoki andi. Nga ozeye nkia diambu kabavovesa o Yesu? Wabavovesa oma ma kintinu kia Nzambi. O Yave wafila Yesu ova ntoto mu longa oma ma Kintinu. Wakwamanana wo vanga yaku nima lufuluku lwandi.

Nga osungamene nki i kintinu kia Nzambi? E kintinu i luyalu lwakieleka lwa Nzambi kun’ezulu. O Yesu i kasola o Nzambi mu kala se ntinu. Nze una twateka longoka, o Yesu wasonga e mpila ntinu kekala muna dikila mimfwa nzala, wuka ambevo yo fula nkutu mafwa.

Ozevo, vava Yesu keyala ezunda dia mvu kun’ezulu, aweyi usinga kala o ntoto? Elo, nza yawonso ikitulwa se paradiso yambote. Ke vekala diaka vita ko, umpumbulu, mayela yovo lufwa. Tuzeye eziku kia diambu diadi kadi Nzambi wavanga ntoto se paradiso mu kuma kia wantu. Ekiaki i kuma kavangila mpatu a Edeni kuna lubantiku. O Yesu olunga-lunga vo luzolo lwa Nzambi lwavangama.

Owau e ntangwa ya vutuka kun’ezulu ifwene. O Yesu lumbu 40 kamoneka kw’alongoki andi. Ozevo, bakala ye ziku vo o Yesu un’o moyo. Kansi una katombokele ko kun’ezulu, ovovese kw’alongoki andi vo: ‘Ke bakatuka muna Yerusaleme ko, yavana betambula mwand’avelela.’ Mwand’avelela i ngolo za Nzambi, wina nze tembwa, usadisa alongoki mu vanga luzolo lwa Nzambi. I bosi Yesu ubavovese vo: ‘Nukala mbangi zame yakuna nsuk’a nza.’

Vava kamana vova mambu mama, diambu diasivi diavangama. Oyantikidi otomboka kun’ezulu nze una omwene vava. I bosi, etuti dimfukidi, alongoki andi ke basidi kumona diaka ko. Yesu wele kun’ezulu. Oyantikidi yala alongoki andi ova ntoto tuka kun’ezulu.