ພະເຍຊູສະເດັດກັບສະຫວັນ
ບົດ 104
ພະເຍຊູສະເດັດກັບສະຫວັນ
ຂະນະທີ່ເວລາຜ່ານໄປ ພະເຍຊູປາກົດຕົວແກ່ເຫຼົ່າສາວົກຂອງພະອົງຫຼາຍເທື່ອ. ເທື່ອນຶ່ງມີສາວົກປະມານ 500 ຄົນເຫັນພະອົງ. ເມື່ອພະອົງປາກົດແກ່ເຂົາ ພະເຍຊູເວົ້າກັບພວກເຂົາເຖິງເລື່ອງອັນໃດເຈົ້າຮູ້ບໍ? ເລື່ອງລາຊະອານາຈັກຂອງພະເຈົ້າ. ພະເຢໂຫວາພະເຈົ້າສົ່ງພະເຍຊູມາແຜ່ນດິນໂລກເພື່ອໃຫ້ສັ່ງສອນເລື່ອງລາຊະອານາຈັກ. ແລະພະອົງເຮັດຢ່າງນີ້ເລື້ອຍໄປແມ່ນແຕ່ຫຼັງຈາກພະອົງໄດ້ຖືກປຸກໃຫ້ເປັນຂຶ້ນຈາກຕາຍ.
ເຈົ້າຈື່ໄດ້ບໍວ່າລາຊະອານາຈັກຂອງພະເຈົ້າຄືຫຍັງ? ແມ່ນແລ້ວ ລາຊະອານາຈັກຄືລັດຖະບານແທ້ຈິງຂອງພະເຈົ້າທາງພາກສະຫວັນ ແລະພະເຍຊູເປັນຜູ້ຊຶ່ງພະເຈົ້າໄດ້ເລືອກໃຫ້ເປັນກະສັດ. ດັ່ງທີ່ເຮົາໄດ້ຮຽນມາແລ້ວ ພະເຍຊູໄດ້ສະແດງໃຫ້ເຫັນວ່າພະອົງຈະເປັນກະສັດທີ່ດີຍອດຢ້ຽມອີ່ຫຼີ ເພາະໄດ້ລ້ຽງອາຫານຄົນທີ່ຫິວ ປິ່ນປົວຄົນເຈັບປ່ວຍໃຫ້ຫາຍດີ ແລະປຸກຄົນຕາຍແລ້ວໃຫ້ມີຊີວິດອີກ!
ດັ່ງນັ້ນເມື່ອພະເຍຊູປົກຄອງເປັນກະສັດທາງພາກສະຫວັນເປັນເວລາພັນປີ ສະພາບທາງແຜ່ນດິນໂລກຈະເປັນຢ່າງໃດ? ແມ່ນແລ້ວ ແຜ່ນດິນໂລກທັງໝົດຈະຖືກປັບປຸງໃຫ້ເປັນອຸດທະຍານທີ່ສວຍງາມ. ການສົງຄາມຫຼືອາດຊະຍາກຳ ຄວາມເຈັບປ່ວຍຫຼືຄວາມຕາຍຈະບໍ່ມີອີກຕໍ່ໄປ. ເຮົາຮູ້ເລື່ອງນີ້ເປັນຄວາມຈິງເພາະວ່າພະເຈົ້າໄດ້ສ້າງແຜ່ນດິນໂລກໃຫ້ເປັນອຸດທະຍານເພື່ອໃຫ້ມະນຸດມີຄວາມສຸກ. ດ້ວຍເຫດນີ້ໃນຕອນເລີ່ມຕົ້ນພະອົງຈຶ່ງສ້າງສວນເອເດນຂຶ້ນ. ແລະພະເຍຊູຈະເຮັດໃຫ້ແນ່ໃຈວ່າສິ່ງຊຶ່ງພະເຈົ້າປະສົງນັ້ນຈະບັນລຸຜົນສຳເລັດໃນທີ່ສຸດ.
ບັດນີ້ເຖິງເວລາກຳນົດທີ່ພະເຍຊູຈະຕ້ອງສະເດັດກັບໄປສະຫວັນ. ພະເຍຊູໄດ້ສຳແດງຕົວພະອົງເອງແກ່ພວກສາວົກຂອງພະອົງໃນລະຫວ່າງ 40 ມື້. ດັ່ງນັ້ນພວກເຂົາຈຶ່ງແນ່ໃຈວ່າພະອົງມີຊີວິດອີກແທ້ໆ. ແຕ່ກ່ອນທີ່ພະອົງລາຈາກໄປ ພະອົງບອກພວກສາວົກຂອງພະອົງວ່າ: ‘ຈົ່ງລໍຖ້າຢູ່ທີ່ນະຄອນເຢຣຶຊາເລມຈົນກວ່າທ່ານທັງຫຼາຍຈະໄດ້ຮັບພະວິນຍານບໍລິສຸດ.’ ພະວິນຍານບໍລິສຸດຄືພະລັງງານຂອງພະເຈົ້າ ຄ້າຍກັນກັບລົມພັດ ຊຶ່ງຈະຊ່ວຍເຫຼົ່າສາວົກຂອງພະອົງໃຫ້ປະຕິບັດຕາມທີ່ພະເຈົ້າປະສົງ. ໃນທີ່ສຸດພະເຍຊູຕັດວ່າ: ‘ທ່ານທັງຫຼາຍຈະຕ້ອງເທສະໜາປະກາດກ່ຽວກັບເຮົາຈົນເຖິງທີ່ສຸດປາຍແຜ່ນດິນໂລກ.’
ຫຼັງຈາກພະເຍຊູຕັດຄຳນີ້ແລ້ວ ສິ່ງໜ້າງຶດງໍ້ເກີດຂຶ້ນ. ພະອົງເລີ່ມສະເດັດໄປສະຫວັນ ດັ່ງທີ່ເຈົ້າເຫັນນະທີ່ນີ້. ຄັນແລ້ວມີເມກບັງພະອົງໄວ້ຈາກສາຍຕາ ແລະເຫຼົ່າສາວົກບໍ່ເຫັນພະເຍຊູອີກ. ພະເຍຊູສະເດັດໄປສະຫວັນແລະພະອົງເລີ່ມປົກຄອງເໜືອສາວົກຂອງພະອົງທີ່ແຜ່ນດິນໂລກ.
1 ໂກລິນໂທ 15:3-8; ຄຳປາກົດ 21:3, 4; ກິດຈະການ 1:1-11.