MPANJI 104

Yesu Nafunti Mwiwulu

CHIMUNAHITI mafuku, Yesu hakudimwekesha kudi atumbanji twindi kakavulu. Kwakwihi nawatumbanji 500 hiyakumumona hampinji yimu. Chinamwekaniyi kudi wena, wuneluki chuma chinayilejiyi? Wayilejeli hawanta waNzambi. Yehova watemesheli Yesu hamaseki nakutañisha hansañu yaWanta. Nawa watwalekelihu kwila mwenimu nihanyima yakusañuka kwindi mudi afu.

Wunakwanuka wanta waNzambi hichumanyi? Eña, Wanta hinfumulumendi yalala yaNzambi yamwiwulu, nawa Yesu Diyi anatondiwu kwikala mwanta kudi Nzambi. Neyi chitunadizi, Yesu wamwekesheli chakekalayi mwanta wabadika kuhitila mukudyisha adi nanzala, nikuuka akata nikusañula afu kuyileta kuwumi!

Dichi chakayulañayi Yesu neyi mwanta mwiwulu hadi ikombakaji danyaka, hamaseki hakekala ñahi? Eña, iseki dejima akadilisha kwikala paradisa yayiwahi. Hikwakela njita, hela wubanji, hela yikatu, hela kufwaku. Tuneluki netu mwalala muloña Nzambi waleñeli iseki kwikala paradisa kulonda nindi antu adiluñisheña. Dimuloña waweni waleñeleliyi itempa daEdeni hakusambila. Nawa Yesu wakamona kwila nindi chuma chinakukeñayi Nzambi nindi chizatiki chiña chikamwekani.

Mpinji yinashikili dehi yakufunta Yesu mwiwulu. Hamafuku 40 Yesu wadiña nakudimwekesha kudi atumbanji twindi. Ichi aneluki chikupu nawu Yesu wamumi cheñi. Ilaña henohu kanda yambuki nawatumbanji twindi hakuyileja nindi: ‘Shakamenu muYerusalema nakushika himwakatambwila spiritu yajila.’ Spiritu yajila hiñovu yaNzambi yazatikaña, yidi neyi mpepela yinakukunka, yikakwasha atumbanji twindi kwila mwaya nkeñelu yaNzambi. Nkumininaku, Yesu hakuhosha nindi: ‘Chiña mwakashimwini hadami mumatuña akwakulehi.’

Yesu chinahoshiyi mazwawa, chuma chakuhayamisha hichikumwekana. Hakutachika kuya mwiwulu, neyi chiwunakumona hanu. Ivu hidikumubuta, nawa atumbanji hiyamumweni Yesu cheñiku. Yesu nayi mwiwulu, nawa mwenimu hakutachika kuyula atumbanji twindi hamaseki.

1 Akorinda 15:3-8; Chimwekeshu 21:3, 4; Yililu 1:1-11.