YÁʼA ki̱vi̱ ku̱a̱ʼa̱nña, ta̱ Jesús ku̱a̱ʼá yichi̱ ki̱tara nu̱ú na̱ ndíku̱n sa̱tára. Iin yichi̱ ki̱tara nu̱ú 500 na̱ discípulo. Tá ki̱tara nu̱úna, ¿á xíni̱ún ndáaña ni̱ka̱ʼa̱nra xa̱ʼa xíʼinna? Ni̱ka̱ʼa̱nra xíʼinna xa̱ʼa ña̱ kaʼndachíñu Ndióxi̱, xa̱ʼa ña̱yóʼo Jehová chi̱ndaʼára ta̱ Jesús nu̱ú Ñuʼú yóʼo ña̱ sanáʼa̱ra na̱ yiví. Tá nda̱takura kǒo níndakoora ña̱ natúʼunra xa̱ʼa ña̱yóʼo xíʼinna.

¿Ndáaña kúni̱ kachi ña̱ kaʼndachíñu Ndióxi̱? Ña̱yóʼo kúni̱ kachiña Ndióxi̱ nda̱ka̱xinra ta̱ Jesús ña̱ kuura rey. Ta xa̱sa̱kuaʼayó tá ni̱xi̱yo ta̱ Jesús nu̱ú Ñuʼú yóʼo ni̱na̱ʼa̱ra ña̱ va̱ʼaní rey kuura chi ta̱xira ña̱ʼa xi̱xi na̱ xíʼi̱ so̱ko, sa̱ndáʼara na̱ xi̱kuumií kue̱ʼe̱, ta nda̱a̱ na̱ ni̱xi̱ʼi̱ sa̱ndátakura.

Ña̱kán, tá ná kaʼndachíñura chí ndiví ti̱xin ña̱ iin mil ku̱i̱ya̱, ¿ndáa ki̱ʼva koo nu̱ú Ñuʼú yóʼo? Iníísaá nu̱ú Ñuʼú yóʼo liviní kooña. Ta kǒoka kue̱ʼe̱ koo, ni ña̱ kini, ni ku̱a̱chi ta ni kǒoka na̱ yiví kuvi. Kúnda̱a̱-iniyó ña̱ saá koo, saáchi Ndióxi̱ i̱xava̱ʼara Ñuʼú yóʼo ña̱ liviní kooña ta koo na̱ yiví nu̱úña. Ña̱kán nda̱salivira iin táʼvi loʼo nu̱ú Ñuʼú yóʼo, ta xi̱naníña Edén. Ta̱ Jesús kúú ta̱ saxínu ña̱ kúni̱ Ndióxi̱.

Xa̱ki̱xa̱a̱ tiempo ña̱ ndikó ta̱ Jesús chí ndiví. Soo 40 ki̱vi̱ ki̱tara nu̱ú na̱ discípulora ta na̱yóʼo xíni̱na tákuvara vitin. Tá kúma̱níka ku̱ʼu̱nra chí ndiví ni̱ka̱ʼa̱nra xíʼinna: ʼKoondó ñuu Jerusalén nda̱a̱ ná ndakiʼinndó espíritu yi̱i̱ Ndióxi̱ʼ. Ña̱yóʼo kúú nde̱e Ndióxi̱ táki̱ʼva íyo ta̱chí saá íyoña. Ña̱yóʼo chindeé miína ña̱ keʼéna ña̱ kúni̱ Ndióxi̱. Tasaá ni̱ka̱ʼa̱n ta̱ Jesús xíʼinna: ʼNdóʼó ku̱ʼu̱nndó natúʼunndó xa̱ʼíi̱ xíʼin na̱ yiví ña̱ iníísaá ñuyǐvíʼ.

Tándi̱ʼi ni̱ka̱ʼa̱nra ña̱yóʼo íyo iin ña̱ ku̱u. Ki̱xaʼára ku̱a̱ʼa̱n ndaara chí ndiví táki̱ʼva xítoún nu̱ú na̱ʼná yóʼo. Tándi̱ʼi ni̱sa̱ʼvira chí sa̱tá vikó ta kǒokara níxinina. Ku̱a̱ʼa̱nvara chí ndiví, tasaá ki̱xaʼára xáʼndachíñura chí ndiví nu̱ú na̱ ndíku̱n sa̱tára nu̱ú Ñuʼú yóʼo.