Tanojnots 104

Jesús oksepa yajki iluikak

KEMAN panotiaya tonalmej, Jesús miakpa kinimonextilij itatojtokakauan. Se tonal kemej 500 imomachtijkauan kiitakej. Keman kinimonextilij, ¿tikmati toni ika kininojnotsak? Ika itekiuajyo Dios. Jiova kiualtitanka Jesús nikan Taltikpak maj tamachtiki ika iTekiuajyo Dios. Yej kichiuak nejin, uan kisentokak kichiuak satepan keman moajokuik tatajko mikemej.

¿Tikelnamiki toni itekiuajyo Dios? Se yekmelauj itayekanalis Dios tein yetok iluikak, uan yej kijitak Jesús maj mochiua tekiuaj. ¡Kemej tikitakejya, keman tekiuajtis Jesús eski tel kualtsin, kemej kinextij ijkuak kintamakak tein mayanayaj, kinpajtij kokoyanij, uan no kinajokuik mikemej!

Yejika, keman Jesús tekiuajtitos iluikak se mil xiujtika, ¿toni mochiuas nikan Taltikpak? Kemaj, semanauak Taltikpak mochiuas se kualtsin xochital. Amo onkasok neteuilmej, temiktilis, kokolismej, niono mikilis. Tikmatij ika ijkon eski, porin Dios kichijchiuak Taltikpak maj eskia se xochital uan maj ompa neminij takamej uan siuamej. Yejika kichijchiuak xochital itech Edén. Jesús kiitas maj mochiua tein Dios kineki.

Jesús kinimonextilij imomachtijkauan 40 tonalmej, ijkon kimatkej ika oksepa yoltoya. Sayoj ika, ajsikaya tonal keman Jesús monekia oksepa yas iluikak. Achtopa keman yej yaskia, kiniluij: ‘Ximokauakan Jerusalén, uan xikchiakan maj xikselikan yektikatsin espíritu’. Nejin yejua ichikaualis Dios tein tekititok, kemej ejekat tein tepitsa, kinpaleuiskia itatojtokakauan maj kichiuanij itanejnekilis Dios. Ika tamik, Jesús kiniluij: ‘Namejuan noka nantanojnotsaskej semanauak Taltikpak’.

Satepan keman kiniluij nejon, mochiuak teisa tein kimojkaitakej. Yej peuak pankisa iluikak, kemej tikita itech taixkopin. Satepan se mixti kitsakuilij, uan imomachtijkauan amo uelikok kiitakej. Jesús oksepa yajki iluikak, uan ompa peuak kinixyekana itatojtokakauan nikan Taltikpak.

1 Corintios 15:3-8; Apocalipsis 21:3, 4; Hechos 1:1-11.