HE MOLE e tau aho takitaha, ne lagaloga e fakakite e Iesu a ia ke he tau tutaki haana. Taha mogo ne kavi ke he 500 e tutaki ne kitia a ia. Magaaho ne fakakite a ia ki a lautolu, iloa nakai e koe ko e heigoa ha Iesu ne tala age ki a lautolu? Ko e kautu he Atua. Ne fakafano mai e Iehova a Iesu ke he lalolagi ke fakaako hagaao ke he Kautu. Ne taute e ia e mena nei ti pihia foki he mole e liu tu mai a ia he mate.

Manatu nakai e koe ko e heigoa e kautu he Atua? E, ko e Kautu ko e fakatufono mooli he Atua i luga he lagi, ti ko Iesu ko Ia ne fifili he Atua ke eke mo patuiki. Tuga ne iloa e tautolu, ne fakakite e Iesu to eke a ia mo patuiki mitaki lahi he fagai a lautolu ne hoge, fakamaulu a lautolu ne gagao, ti liu fakatu mai foki a lautolu ne mamate ke he moui!

Ti ko e magaaho ka pule a Iesu i luga he lagi ke he taha e afe tau, to fēfē la e lalolagi? E, to eke e lalolagi katoa mo parataiso fulufuluola. To nakai liu ke fai felakutaki, po ke matahavala, po ke gagao, po ke mate foki. Iloa e tautolu to mooli e mena nei ha kua taute he Atua e lalolagi ke eke mo parataiso ke fiafia e tau tagata ki ai. Ko e kakano hanei ati taute e ia e katene ko Etena he kamataaga. Mo e to eketaha a Iesu ke taute e tau mena kua manako e Atua ke taute he mogo fakamua.

Kua hoko mai tuai e magaaho ma Iesu ke liu hake ke he lagi. Ne fakakite age e Iesu a ia ke he tau tutaki haana ke he 40 e aho. Ti kua iloa moolioli e lautolu kua moui tuai a ia. Ka e ato toka e ia e tau tutaki haana ne tala age a ia ki a lautolu: ‘Nonofo mau i Ierusalema ato moua e mutolu e agaga tapu.’ Ko e agaaga tapu ko e malolō gahuahua he Atua, tuga e matagi kua havili, to lagomatai ai e tau tutaki haana ke taute e finagalo he Atua. Fakahiku ai, ne pehē a Iesu: ‘To fakamatala a mutolu hagaao ki a au ke hoko atu ke he tau faahi oti he lalolagi.’

He oti e talahau e Iesu e mena nei, ne tupu e taha mena ofoofogia. Ne kamata a ia ke hake ke he lagi, tuga kua kitia e koe hinei. Ti galo a ia he aolū, ti nakai liu e tau tutaki kitia a Iesu. Ne hake a Iesu ke he lagi, ti kamata a ia ke pule mai i ai ke he tau tutaki haana he lalolagi.