MOKUPITA kuononthiki, Yesu wamonekela ovalanduli vae ovikando ovinyingi. Otyikando tyimue amonwa novalongwa 500. Etyi amoneka kovalongwa vae, utyii oityi Yesu evetolela? Wevepopila Ouhamba wa Huku. Yehova watumine Yesu pano pohi opo alongese kombinga Youhamba oo wa Huku. Yesu watualeleko okulinga otyilinga otyo alo umue puetyi atutila.

Uhinangela oityi Ouhamba wa Huku? Enga, Ouhamba outumini wa Huku wotyotyili keulu. Huku waholovona Yesu opo akale ohamba, ngetyi tuelilongesale. Yesu walekesa okuti makakala ohamba imue ondalawa, puetyi aavela okulia ovanthu ankho vokuna ondyala, netyi avelula ovavei, netyi atutilisa vokuankhia.

Ngotyo, putyina Yesu makatumina ngo hamba keulu omanima ovityita ekwi, oohi maikakala ñgeni? Oohi aiho maikakala omphangu imue ongwa yombembwa. Kamakukakala vali ovita, noungangala, nouvela, no nonkhia. Tutyii okuti otyo otyili mokonda Huku walinga oohi opo ikale omphangu yombembwa. Otyo potete alingilile otyikunino tyo Edene. Iya Yesu makafuisapo atyiho Huku ahanda.

Pahe ankho omuvo wehikapo opo Yesu akondoke keulu. Yesu welilekesa kovalongwa vae mononthiki 40. Ngotyo, vakala nonthumbi yokuti Yesu una omuenyo. Anthi, puetyi nkhele ehenesepo ovalongwa vae, Yesu evetolela okuti: ‘Kalei mo Jelusalei alo mutambula ospilitu sandu.’ Ospilitu sandu ononkhono mba Huku, mbukahi ngomphepo. Ononkhono ombo ankho ombo mambukuatesako ovalanduli vae opo valinge ehando lia Huku. Okuhulako, Yesu wapopia okuti: ‘Muna yokuivisa kombinga yange kononthele ambuho mboohi.’

Etyi Yesu amana okupopia, papita otyipuka tyimue tyihuvisa. Yesu wahimbika okuyelukapo okuenda peulu, ngetyi uluete polutalatu apa. Ekaka limue alimuhitika, iya ovalongwa avehemumono vali. Yesu wakondoka keulu, iya ahimbika okutumina ovalanduli vae pano pohi.