Ekitebyo 104

Yesu Okugaruka omu Iguru

EBIRO ku bihinguraho, Yesu ayeyoreka abakuratsi be emirundi mingi. Rimwe abeegi nka 500 bakamureeba. Obu yaabeyoreka, noomanya Yesu eki yaaganiireho nabo? N’aha Bukama bwa Ruhanga. Yehova akoohereza Yesu omu nsi okwegyesa aha Bukama Bwe. Kandi akagumizamu naakora atyo aherize kuzoorwa omu bafu.

Noijuka eki obukama bwa Ruhanga buri? Eego, Obukama ni Gavumenti ya Ruhanga ey’omu iguru, kandi Yesu Niwe Ruhanga yaatooraine kuba omugabe. Nk’oku twegire, Yesu akooreka ngu naija kuba omugabe murungi munonga obu yaariisa abaine enjara, akatambira abarwaire, kandi akazoora n’abafu!

Obu Yesu aritegyekyera omu iguru okumara emyaka rukumi, ensi eryashushana eta? Eego, ensi yoona eryahindurwa ekibanja kya Ruhanga ekirungi munonga. Tiharigaruka kubaho ntaro, obutemu, nari endwara n’obu kwakuba okufa. Nitumanya ngu aga n’amazima ahabw’okuba Ruhanga akahanga ensi kuba nungi munonga ngu abantu bagishemerererwemu. Egi niyo nshonga ahabw’enki omu kutandika yaahangire omusiri Edeni. Aha muheru, Yesu naija kuhamiza kimwe ngu ebi Ruhanga arikwenda bikorwe byahikiirizibwa.

Obwire hati bwahika Yesu okugaruka omu iguru. Amazire ebiro 40 naayeyoreka abeegi be. N’ahabw’ekyo nibahamiza kimwe ku agarukire kuba ohuriire. Kwonka atakatsigireho beegi be abagambira ati: ‘Mugume omuri Yerusaalemu okuhitsya obu muritunga omwoyo orikwera.’ Omwoyo orikwera n’amaani ga Ruhanga agarikukora, nk’omuyaga ogurikuhoorera, agarikwija kuhwera abakuratsi be kukora ebi Ruhanga akunda. Aha muheru, Yesu agira ati: ‘Mwine kubuurira ebirikunkwataho okuhitsya aha muheru gw’ensi.’

Yesu ku yaaherize kugamba eki, ekintu ky’okutangaaza kyabaho. Yaatandika kutemba omu iguru, nk’oku orikureeba aha. Bwanyima ekicu kyamushweka tiyagaruka kureebwa. Yesu yaatemba omu iguru, yaatandika kutegyeka abakuratsi be naayema omu iguru.

1 Abakorinso 15:3-8; Okushuuruurwa 21:3, 4; Ebyakozirwe 1:1-11.