MEKƐ dɔɔnwo pɛle nu la, Gyisɛse yele ɔ nwo ali hilele ye ɛdoavolɛma ne fane dɔɔnwo. Mekɛ bie anu ɛdoavolɛma mɔɔ bo 500 la nwunle ye. Mekɛ mɔɔ ɔkɛye ɔ nwo ɔkɛhile bɛ la ɛze edwɛkɛ mɔɔ ɔka ɔkile bɛ a? Nyamenle belemgbunlililɛ ne anwo edwɛkɛ ɔ. Gyihova zoanle Gyisɛse rale azɛlɛ ye azo kɛ ɔrahilehile Belemgbunlililɛ ne anwo debie. Na ɔhɔle zolɛ ɔyɛle ɛhye wɔ mekɛ bɔbɔ mɔɔ bɛdwazole ye bɛvile ewule nu la.

Asoo ɛkakye mɔɔ Nyamenle belemgbunlililɛ ne de la ɔ? Ɛhɛe, Belemgbunlililɛ ne le Nyamenle anwuma arane kpalɛ, na Gyisɛse a Nyamenle ɛkpa ye kɛ zolɛ belemgbunli a. Kɛmɔ yɛlumua yɛnwu ye la, Gyisɛse hilele kɛ ɔbazi yeayɛ belemgbunli mɔɔ anwo yɛ nwanwane la ɔlua menli mɔɔ ɛhɔne ɛlɛku bɛ mɔɔ ɔmanle bɛ aleɛ, menli mɔɔ ɛnde kpɔkɛ mɔɔ ɔyɛle bɛ ayile yɛɛ menli mɔɔ ɛwu bɔbɔ mɔɔ ɔdwazole bɛ ɔrale ngoane nu la azo!

Ɛhye ati saa Gyisɛse di tumi wɔ anwuma kɛ belemgbunli ɛvolɛ apenle a, kɛ ninyɛne bazi ayɛ wɔ azɛlɛ ne azo ɛ? Ɛhɛe, bɛbahakyi azɛlɛ ne amuala bɛayɛ ye paladaese kɛnlɛma bie. Konle anzɛɛ amumuyɛyɛlɛ anzɛɛ anwodolɛ anzɛɛ ewule bɔbɔ ɛnrɛdɛnla ɛkɛ ne bieko. Yeze kɛ ɛhye le nɔhalɛ ɔluakɛ Nyamenle yɛle azɛlɛ ne kɛ ɔyɛ paladaese mɔɔ menli balie bɛ nye wɔ nuhua a. Ɛhye ati a mɔlebɛbo ne ɔyɛle Yidɛn tola ne a. Na Gyisɛse banlea amaa bayɛ mɔɔ Nyamenle kpondɛ la amuala.

Akee mekɛ ne dwule kɛ Gyisɛse sia kɔ anwuma. Gyisɛse ɛye ɔ nwo ɛhile ye ɛdoavolɛma ne wɔ kenle 40 anu. Yemɔti bɛnwunle ye wienyi kɛ ɔde aze bieko. Noko kolaa na yeagyakyi ye ɛdoavolɛma ne la ɔhanle ɔhilele bɛ kɛ: ‘Bɛhendɛ wɔ Gyɛlusalɛm kɔkpula kɛ bɛ sa kɛha sunsum nwuanzanwuanza ne.’ Sunsum nwuanzanwuanza ne le Nyamenle nyɛleɛ tumi, mɔɔ le kɛ anwoma mɔɔ ɔbɔ, mɔɔ baboa ye ɛdoavolɛma ne yeamaa bɛayɛ Nyamenle ɛhulolɛdeɛ a. Awieleɛ kolaa ne, Gyisɛse hanle kɛ: ‘Ɔwɔ kɛ bɛka me nwo edwɛkɛ wɔ aleɛabo ɛleka biala.’

Gyisɛse hanle edwɛkɛ ɛhye wiele la, debie ɛzulolɛ bie zile. Ɔbɔle ɔ bo kɛ ɔkɔ anwuma kɛmɔ ɛnwu ye wɔ ɛke la. Akee amungu ne liele ye vile bɛ nye zo, na ɛdoavolɛma ne annwu Gyisɛse bieko. Gyisɛse hɔle anwuma, na ɔbɔle ɔ bo kɛ ɔdi ye ɛdoavolɛma ne mɔɔ wɔ azɛlɛ ye azo la anwo zo tumi wɔ nehane.