XEQʼAX ri täq qʼij, tekʼuriʼ ri täq ajtijoxel xkil chi na kʼi täq mul ri Jesús. Pa jumul, weneʼ e kʼo 500 täq rajtijoxel xkilo. Chiʼ xkilo, ¿la awetaʼm su xubʼij Jesús chike? Xchʼaw chirij rajawbʼäl ri Ajawaxel. Jehová xutaq lo ri Jesús cho ruwäch Ulew rech kukʼut chirij ri Ajawbʼäl. Tekʼuriʼ xuya ta kan ubʼanik wariʼ xuqujeʼ chiʼ xkʼastaj che kixoʼl ri kamnäq.

¿La xsach ta pa ajolom sulaʼ ri rajawbʼäl ri Ajawaxel? Are jun qastzijalaj uqʼatbʼaltzij ri Ajawaxel kʼo pa ri kaj xuqujeʼ ri Ajawaxel Xuchaʼ ri Jesús rech kubʼan ajawinel. ¡Xqilo che, Jesús xukʼutu che are jun utzalaj ajawinel chiʼ xuya kiwa ri täq winaq, xeʼukunaj ri täq yawabʼ xuqujeʼ xeʼuwalasaj ri täq kamnäq!

Rumal laʼ, chiʼ ri Jesús kubʼan qʼatbʼaltzij pa ri kaj chupam mil junabʼ, ¿su kbʼantaj cho ruwäch Ulew? Jeʼ, ronojel ruwäch Ulew kubʼan na jeʼlikalaj kotzʼiʼj uwäch. Kʼo ta chi chʼoj, kʼo ta chi itzelal, kʼo ta chi yabʼil xuqujeʼ kʼo ta chi kamikal. Qetaʼm che jelaʼ rumal che Ajawaxel xubʼan ri Ulew rech kubʼan kotzʼiʼjalaj uwäch che rech e kʼo ri winaq chilaʼ. Rumal laʼ xubʼan ri kotzʼiʼjalaj Edén. Jesús kubʼan na che kbʼan ronojel ri kraj ri Ajawaxel.

Xopan ri qʼij che ri Jesús ktzalij pa ri kaj. Chupam 40 qʼij xukʼut ribʼ che kiwäch ri täq rajtijoxel, xuqujeʼ ri täq ajtijoxel ketaʼm che ri Jesús kʼaslik. Tekʼuriʼ chiʼ majaʼ kbʼe pa ri kaj xubʼij wariʼ chike: ‹Chixkanaj kan pa Jerusalén rech kikʼam na ri ixlabʼixel, o espíritu santo›, xchaʼ. Wariʼ are ri uchoqʼabʼ ri Ajawaxel, junam rukʼ ri kaqiqʼ, o tew, che kselabʼik rech keʼutoʼ ri täq ajtijoxel rech kkebʼan ri utaqonik ri Ajawaxel. Kʼisbʼal re, Jesús xubʼij wariʼ: ‹Ix kixchʼaw na chuwij chike ri winaq cho ronojel ruwäch Ulew›.

Chiʼ xukʼis ubʼixik wariʼ, kʼo jun xbʼantajik. Ri Jesús xpaqeʼ pa ri kaj, chawilampeʼ pa ri wachbʼäl. Tekʼuriʼ jun sutzʼ xuchʼuqu tekʼuriʼ ri täq ajtijoxel xekun ta chik xkilo. Jesús xbʼe pa ri kaj, xumaj ubʼanik uqʼatbʼaltzij pa kiwiʼ ri rajtijoxel e kʼo cho ruwäch Ulew.