CHAY punchawkunallapim Jesusqa achka kutita qatiqninkunaman rikuriykurqa. Huk kutipi yaqa 500 discipulonkuna rikururqaku. Rikuriykuspaqa ¿yachankichu imamantataq Jesusqa rimarqa? Diospa munaychakusqanmanta. Jehová Diosmi Jesustaqa Allpaman kachamurqa Munaychakuyninmanta yachachinanpaq. Chaytamá wañukusqanmanta kawsariramuspanpas Jesusqa hinalla yachachichkan.

¿Yuyarichkankichu imataq Diospa munaychakusqan kasqanta? Hanaq pachapi Diospa gobiernasqanmi, Jesusñataq rey kananpaq Diospa Sapaqchasqan. ¡Yachasqanchikman hina, yarqasqakunata mikuchispan, onqoqkunata sanoyachispan chaynataq wañusqakunatapas kawsarichispam Jesusqa reqsichikurqa rey hina kamachikamuspa alli-allinta rurananta!

Chaymi, hanaq pachamanta Jesus waranqa wata kamachikamuptinqa, ¿imaynataq Allpa pachaqa kanqa? Enteron Allpam suma-sumaq paraiso kanqa. Manañam guerrakunapas, dañanakuypas, onqoykunapas nitaq wañuypas kanqañachu. Chayna kanantaqa yachanchikmi Allpata Dios unanchaspanqa chaypi runakuna paraisopi kawsakunankupaq rurasqanwan. Chaymi Eden huertataqa rurarqa. Jesusmi Jehová Diospa munasqantapuni ruranqa.

Jesuspa hanaq pachaman kutinanpaq tiempoñam. Jesusqa 40 punchawmi discipulonkunaman rikuriykurqa, hinaptinmi paykunaqa kawsariramusqanta yacharqaku. Manaraq pasakuchkaspam payqa nirqa: ‘Jerusalen llaqtapim suyaykunkichik chuya espirituta chaskinaykichikkama’ nispa. Chuya espirituqa Diospa imatapas ruraq kallpanmi, kayqa qatiqninkunata yanapanqa Diospa munayninta ruranankupaq. Chaymantañataq Jesusqa nirqa: ‘Qamkunam ñoqamanta willakunkichik kay Pachapa cantonkama’ nispa.

Chaynata niruspanmi admirakunapaq kaqta rurarqa. Qawasqaykiman hinam Jesusqa hanaq pachaman hoqarikururqa. Hinaptinmi puyu ukunta chinkaykuptin discipulonkunaqa manaña rikurqakuchu. Jesusqa hanaq pachaman pasakuspanmi kay Pachapi qatiqninkunata gobiernayta qallarirqa.