NJENGOBA emalanga achubeka, Jesu watibonakalisa kubalandzeli bakhe tikhatsi letinyenti. Ngalesinye sikhatsi cishe bafundzi labangu-500 bambona. Nakabonakala kubo, uyati kutsi abekhuluma ngani? Abekhuluma ngembuso waNkulunkulu. Jehova watfumela Jesu emhlabeni kutsi atewufundzisa ngeMbuso. Wachubeka afundzisa ngawo ngisho asavusiwe ekufeni.

Usakhumbula kutsi uyini umbuso waNkulunkulu? UMbuso nguhulumende waNkulunkulu losezulwini, futsi Jesu uyinkhosi leYodvwa lekhetfwe nguNkulunkulu yalowo mbuso. Njengoba sifundzile, Jesu wabonisa kutsi angaba yinkhosi lekahle kakhulu, ngoba wesutsisa labalambile, welapha labagulako, waphindze wavusa ngisho nalabafile.

Jesu nasekabusa ezulwini iminyaka leyinkhulungwane, kutawuba njani emhlabeni? Umhlaba wonkhe uyowentiwa ube lipharadisi lelihle. Angeke kusaba khona timphi, bugebengu, kugula, ngisho nekufa. Siyati kutsi loku kuliciniso ngoba Nkulunkulu abente lomhlaba kutsi ube lipharadisi lapho bantfu bebatawuhlala khona bajabulile. Kungako ekucaleni enta insimi yase-Edeni. Jesu uyociniseka kutsi loko Nkulunkulu lafuna kwentiwe, kugcina kwenteke ngendlela lefanele.

Sefika sikhatsi sekutsi Jesu abuyele ezulwini. Emalanga langu-40 abesolo ativeta kubafundzi bakhe, ngako besebaciniseka kutsi vele uvusiwe. Kodvwa ngembi kwekutsi abashiye watsi kubo: ‘Ningesuki eJerusalema nize nemukele umoya longcwele.’ Umoya longcwele ungemandla Nkulunkulu lawasebentisako ekwenteni tintfo. Ufanana nemoya lohhushako. Usita balandzeli baNkulunkulu kutsi bente intsandvo yakhe. Ekugcineni Jesu watsi kubo: ‘Kufanele nishumayele ngami etincenyeni letikhashane temhlaba.’

Watsi nje nakacedza kusho loko, kwenteka intfo lesimanga kakhulu. Wacala kwenyukela ezulwini, njengoba nje umbona kulesitfombe. Lifu labese liyambonya wangasabonakali. Bafundzi bakhe abaphindzanga bambona. Jesu waya ezulwini futsi wacala kubusa balandzeli bakhe labasemhlabeni kusukela ngaleso sikhatsi.