104-нҗи хекая

Иса гөге доланяр

ШОЛ гүнлер Иса шәгиртлерине бирнәче гезек гөрүнйәр. Бир сапар оны 500-е голай шәгирди гөрйәр. Шонда Исаның олара нәме гүррүң беренини билйәңми? Ол Худайың патышалыгы барада гүррүң берди. Ехова Исаны ере Патышалык барада вагыз этмек үчин иберди. Ол дирелип, вагыз этмегини довам эдйәр.

Худайың патышалыгының нәмедиги ядыңдамы? Догры, Патышалык Худайың гөкдәки хөкүмети. Иса болса Худайың сайлан Патышасы. Иса ачлары дойруп, кеселлери сагалдып, хатда өлүлери-де дирелдип, гелеҗекде аҗайып патыша болҗакдыгыны гөркезди!

Исаның Мүңйыллык патышалыгында ер йүзи нәхили боларка? Хава, ер йүзи аҗайып Җеннете өврүлер. Шонда уруш, җенаятчылык, кеселчилик, хатда өлүм хем болмаз. Биз мунуң шейле болҗагына ынанярыс. Себәби Худай Ери адамларың багтлы яшамагы үчин яратды. Шонуң үчин ол башда Эрем багыны дөредипди. Иса болса Худайың ислән әхли задыны долы ерине етирер.

Инди Исаның гөге доланмалы вагты гелди. Ол кырк гүнләп шәгиртлерине гөрүнйәр. Олар онуң диридигине ынанярлар. Иса шәгиртлери билен хошлашманка, олара: «Мукаддес рухы алянчаңыз, Иерусалимде галың» диййәр. Мукаддес рух — Худайың херекетдәки гүйҗи, ол өвүсйән ел ялы гөзе гөрүнмейәр. Ол Исаның шәгиртлерине Худайың ислегини ерине етирмәге көмек эдйәр. Ахырында, Иса шәгиртлерине: «Сиз узак юртларда мен хакда вагыз эдерсиңиз» диййәр.

Соңра бир тәсин вака боляр. Суратда гөршүң ялы, Иса гөге галяр. Оны булут бүрәп, шәгиртлери гөрүп билмейәр. Иса гөге галып, ердәки шәгиртлерине гөкден ёлбашчылык эдип башлаяр.

1 Коринтослылар 15:3—8; Ылхам 21:3, 4; Ресулларың ишлери 1:1—11.