Makani 104: Jesu Wajokela Kujulu
MAZUBA mbwaaya ciya, Jesu walitondezya kuli basikwiiya bakwe ziindi zinji. Aciindi cimwi basikwiiya ibasika kuma 500 bamubona. Naalibonya kuli mbabo, hena ulicizyi Jesu ncaabaambila? Wabaambila Bwami bwa Leza. Jehova wakatuma Jesu anyika kuti akayiisye makani aa Bwami. Wakazumanana kucita eeci kufwumbwa buya naakabusyigwa.
Hena ulayeeya kuti bwami bwa Leza ninzi? Ibwami nimfwulumende ini ya Leza yakujulu, alimwi Jesu Ngonguwe Leza ngwaakasala kuba mwami. Mbuli mbotwaiya, Jesu wakatondezya mbwaya kuba mwami wiinda kubota kwiinda mukusanina basinzala, kuponya baciswa akubusya bafwide.
Aboobo Jesu aakulela kali mwami kujulu kwamyaka iili cuulu, ino anyika aya kuba buti? Nyika yoonse iya kusandulwa akuba paladaiso mubotu. Takukabi kabili nkondo, mazwanga, kuciswa niluba lufwu. Tulizyi kuti eeci ncamasimpe nkaambo Leza wakabamba nyika kuba paladaiso kuti bantu kabakkomana. Nkakaambo kaako ncaakabambila muunda wa Edeni kumatalikilo. Alimwi Jesu uya kubona kuti eeco cintu Leza ncayanda kuti cicitike, cacitwa.
Casika ciindi lino cakuti Jesu ajokele kujulu. Kwamazuba aali 40, Jesu wali kulitondezya kuli basikwiiya bakwe. Aboobo bali masimpe kuti nkwali ulapona. Pele katana balaya basikwiiya bakwe, wabaambila wati: ‘Amukkale mu Jelusalemu kusikila mukatambule muuya uusalala.’ Muuya uusalala ninguzu zibeleka zya Leza, mbuli muwo uunga, uya kubagwasya basikwiiya kuti bakonzye kucita kuyanda kwa Leza. Kumamanino Jesu wati: ‘Mweelede kukambauka makani aamba zyandime mumasena oonse aanyika.’
Jesu amane buyo kwaamba makani aaya, kwacitika cintu cimwi cilamya. Ngooyo watalika kuunka kujulu mbuli mbobona aawa. Kumane cikumbi camuvwumbilila Jesu, aboobo basikwiiya baleka kumubona. Jesu waunka kujulu akutalika kulela basikwiiya bakwe anyika kali kujulu.
1 Ba-Korinto 15:3-8; Ciyubunuzyo 21:3, 4; Incito 1:1-11.
Mibuzyo
- Bali bongaye basikwiiya bamubona Jesu kuciindi cimwi, alimwi ncinzi ncaabaambila?
- Ino Bwami bwa Leza ninzi, alimwi ino buumi buya kuba buti anyika Jesu aakulela kali Mwami kwamyaka iili cuulu?
- Ino Jesu walibonya kwamazuba ongaye kuli basikwiiya bakwe, pele ncinzi lino ncayanda kuti acite?
- Katana basiya basikwiiya bakwe, ncinzi Jesu ncaabaambila kuti bacite?
- Ncinzi cicitika acifwanikiso, alimwi mbuti Jesu mbwaaleka kulibonya?
Mibuzyo aimwi
- Bala 1 Ba-Korinto 15:3-8.
Nkaambo nzi mwaapositolo Paulu ncaakaambaula cakusinizya kujatikizya kubuka kwa Jesu, aboobo nzyintu nzi Banakristo nzyobakonzya kwaamba cakusinizya mazuba aano? (1 Cor. 15:4, 7, 8; Is. 2:2, 3; Mt. 24:14; 2 Timo. 3:1-5)
- Bala Incito 1:1-11.
Mbuti mulimo wakukambauka mbowakasakana kweelana ambokwakasinsimwa ku Incito 1:8? (Inc. 6:7; 9:31; 11:19-21; Kol. 1:23)
Andiza Inga Mwaakkomanina Ayaaya
JESU—NENZILA, NGOKASIMPE, MBOBUUMI
Kristo Uli Kujanza lya Leza Lyalulyo
Ino Jesu wakali kunoocita nzi naakali kulindila ciindi cakuti abweze ntaamu yakulwana basinkondonyina?
