BIHAIN tu ol disaipel i lukim Jisas planti taim. Wanpela taim inap olsem 500 disaipel i lukim em. Taim Jisas i kamap long ol, yu save em i toktok wantaim ol long wanem samting? Em i toktok wantaim ol long Kingdom Bilong God. Jehova i salim Jisas i kam long graun bilong skulim ol man long Kingdom. Na Jisas i mekim yet dispela wok taim em i kirap bek pinis.

Yu inap tingim yet Kingdom Bilong God em wanem samting? Yes, dispela Kingdom em i wanpela gavman tru bilong God long heven, na God i bin makim Jisas bilong i stap King bilong en. Olsem yumi lainim pinis, Jisas i kamapim klia olsem em bai stap gutpela King; em bai givim kaikai long ol man i hangre, oraitim ol sikman, na kirapim bek ol man i dai pinis!

Olsem na taim Jisas i bosim graun inap wan tausen yia, wanem ol samting bai kamap long graun? Yes, graun olgeta bai kamap gutpela ples paradais. Bai i no gat pait moa, o pasin nogut, o sik, na ol man bai i no i dai moa. Yumi save ol dispela samting bai kamap tru, long wanem, God i bin wokim graun bilong kamap ples paradais em olgeta man bai amamas long en. Long dispela as na em i bin wokim gaden Iden long pastaim tru. Jisas bai kamapim tru laik bilong God.

Tasol nau Jisas i mas i go bek long heven. Inap 40 de Jisas i kamap long ol disaipel na ol i lukim em. Olsem na ol i save tru olsem em i stap laip gen. Tasol paslain long em i lusim ol disaipel, em i tokim ol: ‘Yupela mas wet i stap long Jerusalem inap long taim yupela i kisim holi spirit.’ Holi spirit em strong bilong God i save mekim wok, em i olsem win, na dispela bai helpim ol disaipel long mekim laik bilong God. Jisas i tokim ol: ‘Yupela i mas autim tok long mi long olgeta hap bilong graun.’

Taim Jisas i mekim pinis dispela tok, wanpela narapela kain samting i kamap. Em i wok long i go antap, olsem yu lukim long piksa hia. Bihain klaut i haitim Jisas na ol disaipel i no inap lukim em moa. Jisas i go long heven, na em i kirap bosim lain bilong em long graun.