EBIRO obu birabaho, Yesu ayeyoleka hali abakurasi be emirundi nyingi. Murundi gumu abegeswa 500 bakamurora. Yesu obu yayeyolekere halibo, nomanya kiki eki yagambireho nabo? Obukama bwa Ruhanga. Yahwe akatuma Yesu kwija munsi kwegesa ha Bukama. Kandi ayeyongera kukora kinu na hanyuma y’okuhumbuurwa kuruga mubafu.

Noijuka obukama bwa Ruhanga nikyo kiki? Mali, obukama nibwo bulemi bwonyini obwa Ruhanga obwomu iguru, kandi Yesu nuwe Ruhanga yakomere kuba omukama. Nkoku tumazire kwega Yesu akoleka ngu naija kuba omukama murungi obu yalisize abaine enjara, obu yakirize abarwaire kandi nobu yahumbwire abafu!

Yesu obu alirema nk’omukama ow’omu iguru kumara emyaka rukumi, kiriba kita mu nsi? Mali ensi yoona erifoorwa orugonjo rwa Ruhanga orurungi muno. Tihalibaho bulemu, rundi okucwa ebiragiro, rundi oburwaire, rundi okufa. Nitumanya ngu kinu ky’amananu habwokuba Ruhanga akakora ensi okuba orugonjo rwa Ruhanga orw’abantu kusemerererwamu. Enu niyo nsonga habwaki yakozire orugonjo rwa Adeni mukubanza. Kandi Yesu naija kurora ngu Ruhanga ebyagonza nibihikirizibwa.

Obwire bukahika Yesu okugaruka omu iguru. Kumara ebiro 40 Yesu abaire nayeyoleka abegeswa be. Nahabwekyo nibasobora kukigumya ngu agarukire kuba omwomezi. Baitu atakalekereho abageswa be, akabagambira ati: ‘Mwikale Yerusalemu okuhikya obu mulitunga omwoyo gurukwera.’ Omwoyo ogurukwera nigo maani ga Ruhanga agakora agakusisana omuyaga, agakaba nigagenda kukonyera abegeswa be okukora Ruhanga ebyagonza. Mukumalirra, Yesu agamba ati: ‘Musemerire kuntebezaho kuhika mu bicweka eby’ensi ebya hara muno.’

Hanyuma y’okugamba binu, eky’okuhuniriza kibaho. Atandika kugenda mu iguru nkoku orukurora hanu. Nubwo ekicu kyamusiikiriza, kandi abegeswa be batagaruke kumurora obundi. Yesu akagenda omu iguru kandi yatandika kulema abegeswa be abakaba bali munsi.