ОЛ ХҮННЕРНИҢ иштинде Иисус бодунуң өөреникчилеринге хөй катап көзүлген. Бир катап ону 500 хире өөреникчилери көрген. Оларга Иисус чүү дугайында чугаалап турарын, билир сен бе? Бурганның чагыргазының дугайында. Иегова Иисусту чер кырынче Чагырга дугайында өөредир кылдыр чортупкан. Ол ооң дугайында дирлип келгеш безин чугаалаарын уламчылавышаан.

Бурганның чагыргазы деп чүл, сактыр-дыр сен бе? Шын-дыр, Чагырга — ёзулуг-ла дээрде турар Бурганның чазаа-дыр, а Иисус — Бурганның шилип алган Хааны-дыр. Бистиң билип алганывыс-биле, Иисус аштап турган улусту чемгерип, аарыг улусту экиртип, өлген улусту безин диргизип тургаш, ол кандыг кайгамчык хаан болурун көргүскен!

Иисустуң муң чыл башкарар үезинде чер кандыг болур ирги? Ийе — бүгү чер кайгамчык чараш дываажаң апаар. Моон соңгаар дайыннар, кем-херек үүлгедиишкиннери, аарыглар болгаш өлүм безин турбас. Бо чүүл күүсеттинер деп билир бис, чүге дизе Бурган черни кижилерниң аас-кежиктиг дываажаң бажыңы болурун күзээн. Ынчангаш-ла Бурган эң-не эгезинде Эде́м садын олурткан. Бурганның бодалы эчизинге чедир күүсеттинер кылдыр, Иисус сагыш човап кылыр.

Ам Иисустуң дедир дээрже эглир үези келген. Дөртен хүн иштинде ол өөреникчилеринге кээп турган. Ол дириг деп, олар бүзүреп турар. Бодунуң өөреникчилерин каар бетинде Иисус аажок дилээн: ‘Ыдыктыг сүлде албаан шааңарда, Иерусали́мден чоруваңар’. Ыдыктыг сүлде — дээрге Иисустуң өөреникчилеринге Бурганның күзелин күүседиринге дузалажыр, хадып турар хат-биле дөмей, Бурганның күжү-дүр. Адак сөөлүнде өөреникчилеринге Иисус даалга берген: ‘Силер мээң дугайымда черниң эң-не ырак кезектеринге суртаалдаар ужурлуг силер’.

Оон бир-ле кайгамчык чүүл болган. Чурукта көргүскени-биле, Иисус дээрже көдүрлү берген. Оон ол булуттар артынче кире бээрге, өөреникчилеринге көзүлбес апарган. Иисус дээрже баргаш, оон тура черде арткан өөреникчилерин башкарып эгелээн.