HA PAGLABAY han mga adlaw, damu ka beses nga nagpakita hi Jesus ha iya mga sumurunod. Ha usa nga higayon, mga 500 nga disipulo an nakakita ha iya. Maaram ka ba kon ano an iginsumat ni Jesus han nagpakita hiya ha ira? An ginhadian han Dios. Ginsugo ni Jehova hi Jesus nganhi ha tuna basi igtutdo an Ginhadian. Ngan padayon nga ginbuhat ito ni Jesus bisan han ginbanhaw na hiya.

Nahinunumdoman mo ba kon ano an ginhadian han Dios? Oo, an Ginhadian usa nga tinuod nga gobyerno han Dios ha langit, ngan hi Jesus an ginpili han Dios nga magin hadi. Sugad han aton hinbaroan, ipinakita ni Jesus nga magigin maopay gud hiya nga hadi pinaagi ha pagpakaon ha mga nagugutom, pagtambal ha magsakit, ngan pagbanhaw pa ngani ha mga patay!

Salit kon maghadi na hi Jesus ha langit ha usa ka yukot ka tuig, ano an magigin kahimtang ha tuna? An bug-os nga tuna magigin makaruruyag nga paraiso. Waray na mga girra, krimen, sakit, o kamatayon pa ngani. Maaram kita nga tinuod ini tungod kay han ginlarang han Dios an tuna, katuyoan niya nga magin paraiso ito nga uukyan han mga tawo. Ito an hinungdan kon kay ano nga ginlarang niya ha tinikangan an hardin han Eden. Ngan sisiguruhon ni Jesus nga matuman an kaburut-on han Dios.

Inabot na an panahon han pagbalik ni Jesus ha langit. Ha sulod hin 40 ka adlaw nagpakita hiya ha iya mga disipulo. Salit sigurado hira nga buhi na hiya. Kondi antes niya bayaan an iya mga disipulo, nagsiring hiya: ‘Magpabilin kamo ha Jerusalem tubtob nga makarawat niyo an baraan nga espiritu.’ An baraan nga espiritu amo an aktibo nga pwersa han Dios, pariho han hangin. Ito an mabulig ha mga sumurunod ni Jesus ha pagbuhat han kaburut-on han Dios. Katapos, hi Jesus nagsiring: ‘Kinahanglan magsangyaw kamo mahitungod ha akon tubtob ha sidsid han tuna.’

Katapos ni Jesus magyakan hini, may-ada urusahon nga nahitabo. Nagtipaigbaw hiya ngadto ha langit, sugad han nakikita mo dinhi. Katapos, natabonan hiya hin dampog ngan waray na hiya makita utro han mga disipulo. Binalik hi Jesus ha langit, ngan didto nagtikang hiya pagmando ha iya mga sumurunod dinhi ha tuna.