Tantara 104

Jesosy Nimpody An-dan̈itry

NATETIKY amy zay iziô Jesosy niboaka tamy mpianatranany. Tandraraiky, mpianatranany kadiriny 500 nahita izy. Hainao raha nikoran̈in’i Jesosy tamin-drô? Fanjakan̈an’ny Zan̈ahary. Jehovah nan̈iraka Jesosy tambony tany tatỳ, hampianatra mikasiky Fanjakan̈a io. Izy mbala nan̈ano zen̈y fo, ndray tafaran’izy natsangana.

Azonao onon̈o ino fanjakan̈an’ny Zan̈ahary zen̈y? Fanjakan̈a io ten̈a fitondrasan̈an’ny Zan̈ahary an-dan̈itry an̈y. Jesosy, Araiky nifidin’ny Zan̈ahary, hatao ampanjaka amy zio. Atsika efa nianatra fa Jesosy ten̈a ampanjaka tsara. Vitany nan̈amia hanin̈y olo mosary, nampahivan̈a olo marary. Nata olo naty mbala vitany fo namelon̈o izy!

Ke han̈ano karakôry tany ty lera Jesosy manjaka an-dan̈itry an̈y, an̈atin’ny arivo taon̈o zen̈y? Tany jiaby hanjary paradisa. Amy zen̈y tsisy lagera eky, tsisy olo kafiry, tsisy aretin̈y, nata fahafatesan̈a. Atsika mahay fa marin̈y raha zen̈y, fôtony Zan̈ahary nan̈ano tany beky hanjary paradisa, hamparavoravo olo. Zen̈y nahavy izy nan̈ano zaridain̈’Edena tamy voanalohany tan̈y. Jesosy han̈ano tany ty, karaha nan̈anaovan’ny Zan̈ahary izy tamy voanalohany in̈y fo.

Jesosy iziô himpody an-dan̈itry amy zay. Efa 40 andra zay, Jesosy niboaka tamy mpianatranany fo. Irô iziô mino tsarabe fa izy velon̈o. Kanefa talohan’izy hiala mpianatranany, izy nivolan̈a: ‘Anarô midokoa Jerosalema fo zisk’anarô mahazo fan̈ahy masin̈y.’ Fan̈ahy masin̈y zen̈y, angôvon’ny Zan̈ahary. Izio man̈ampy mpianatra Jesosy han̈ano sitrapôn’ny Zan̈ahary. Farany, Jesosy nivolan̈a: ‘Anarô mila mikoran̈a mikasiky zaho amy tany jiaby.’

Jesosy koa fa boaka nivolan̈a zen̈y, nisy raha nahagaga. Hitanao amy sary io, izy nanonga an-dan̈itry. Nisy rôndro nandrakotro izy, ke mpianatra Jesosy aby io tsy nahita izy eky. Jesosy iziô an-dan̈itry an̈y, manjaka amy mpianatranany ambony tany eto.

1 Korintianina 15:3-8; Apokalypsy 21:3, 4; Asan’ny Apostoly 1:1-11.