MASIKU pagakupita, Yesu akulilosya kwa ŵakumkuya ŵakwe ndaŵi syejinji. Ndaŵi jine ŵawonecele kwa ŵakumkuya ŵakwe ŵakwana 500. Yesu pakuwonecela kwa jemanjaji, ana akumanyilila yakuŵeceta? Akuŵeceta yakwamba ucimwene wa Mlungu. Yehofa ŵamtumisye Yesu pacilambo capasi kukwiganya ya Ucimwene. Soni akwendelecela kwiganya yeleyi atamose panyuma pakwimuka ku ŵawe.

Ana akukumbucila kuti ucimwene wa Mlungu uli cici? Ucimwene wa Mlungu uli boma jisyesyene ja Mlungu jakwinani, soni Yesu ali mundu juŵamsagwile Mlungu kuti aŵe mwenye jwakwe. Mpela mwatulijiganyicisye, Yesu ŵalosisye kuti caciŵa mwenye jwambone mnope mwa kwalisya ŵasala, kwaposya ŵakulwala, soni atamose kwajimusya ŵawe kuti akole umi!

Sambano Yesu pacacilamulilaga mpela mwenye kwinani kwa yaka 1000, ana pacilambo capasi yindu yiciŵa wuli? Cilambo cosope cacicitenda kuŵa paladaiso jwakusalala. Kuciŵa kwangali ngondo, yitendo yangalumbana, kulwala, soni atamose ciwa. Tukukulupilila kuti yeleyi yili yisyene ligongo Mlungu ŵapanganyisye cilambo capasici kuti ciŵe paladaiso kuti ŵandu asangalale ni umi. Ni ligongo lyakwe jwalakwe ŵapanganyisye mgunda wa Edeni pandanda pene. Soni Yesu cacilolecesya kuti yakusaka Mlungu yitendece.

Sambano ndaŵi jikwanile jakuti Yesu awujile kwinani. Kwa masiku 40, Yesu aŵele mkulilosya jika kwa ŵakumkuya ŵakwe. Sambano jemanjaji akukulupilila kuti jwalakwe ajimwice ku ŵawe. Nambo mkanalekangane ni ŵakumkuya ŵakwe akwasalila kuti: ‘Atame mu Yelusalemu mpaka ali apocele msimu weswela.’ Msimu weswela gali macili gakukamula masengo ga Mlungu, gali mpela mbungo jakwenda, gacigakamucisyeje ŵakumkuya ŵakwe kutenda lisosa lya Mlungu. Kumbesi kwakwe, Yesu akuŵeceta kuti: ‘Akusosekwa kulalicila pakwamba ya une mpaka kumbesi kwa cilambo capasi.’

Yesu paŵamalisisye kuŵeceta maloŵega, pakutendekwa cindu cakusimonjesya. Jwalakwe akutanda kwawula kwinani, mpela mwakuyiwonela pelepa. Kaneko liwunde likumsisa, m’yoyo ŵakumkuya ŵakwe ngakum’wonasoni. Yesu akwawula kwinani, soni akutanda kulamulila ŵakumkuya ŵakwe pacilambo capasi, jwalakwe ali kwinaniko.