Historia 104

Jesús ribiguetaʼ guibáʼ

RIDIʼDIʼ dxi, ne Jesús rihuinni stale biaje nezalú ca xpinni. Ti biaje biiyaʼ 500 discípulo laabe. Ora bihuínnibe nezalucaʼ, nannuʼ xidé riníʼnebe laacaʼ la? De reinu stiʼ Dios. Jiobá biseendabe Jesús lu Guidxilayú riʼ para gusiidiʼ de Reinu riʼ. Ne despué de biásabe lade ca gueʼtuʼ que biʼnirubeni.

Ñee rietenalaʼdxuʼ xii nga Reinu stiʼ Dios la? Nga nga ti gobiernu ni dxandíʼ stiʼ Dios ni nuu guibáʼ, ne Dios Gulí Jesús para gaca rey. Casi maʼ bíʼyanu riʼ, Jesús biluíʼ pabiáʼ sicarú nga modo gueeda gácabe rey ra guyaanabe cani candaana, gusiándabe cani huará, ne ra guindísabe ca ni maʼ guti.

Nga runi, xi zaca lu Guidxilayú riʼ ora Jesús guni reinar guibáʼ pur ti mil iza yaʼ. Guidxilayú riʼ zácani ti paraísu guizáʼ sicarú. Maʼ qué ziuudiʼ guendaridinde, nin guendaruuti, nin guendahuará, ninla guendaguti. Nánnanu de que zácani zacá purtiʼ Dios biʼniʼ Guidxilayú riʼ para ñácani ti paraísu ne nibani binni luni. Ne pur nga bíʼnibe jardín de Edén que. Jesús zuuyaʼ gaca guiráʼ ni racalaʼdxiʼ Dios.

Maʼ bidxiña dxi guibiguetaʼ Jesús guibáʼ. Pur cuarenta dxi maʼ biluiʼbe laabe ca discípulo que ne laacaʼ ránnacaʼ de que nabánibe. Peru ante chebe que rábibe laacaʼ: Laguiaana Jerusalén dede guicaatu espíritu santu. Laani nga stipa stiʼ Dios, ni rundubi casi bi, ne laani nga zacaneni ca xpinni Cristu gúnicaʼ ni na Dios. Jesús biluxené ca diidxaʼ riʼ: Laatu zucheechetu diidxaʼ de naa dede ra jma zitu de lu Guidxilayú.

Despué de guníʼ Jesús ndiʼ la? raca xiixa guendaridxagayaa. Laabe rizulú riguíʼbabe guibáʼ, casi ruuyuʼ lu dibuju riʼ. De raqué la? ruchii ti za laabe, ne ca discípulo stibe maʼ qué lica ruuyacaʼ laabe. Jesús rie guibáʼ, ne de raqué ruzulú runi gobernarbe ca xpínnibe ni nuu lu Guidxilayú riʼ.

1 Corintios 15:3-8; Apocalipsis 21:3, 4; Hechos 1:1-11.