Kuro i Jerucalem
Ododo 105
Kuro i Jerucalem
JO MA tye kany-nyi aye lulub kor Yecu. Gin guwinyo doge ci gubedo i Jerucalem. Dok i kare ma gitye kacel ka kurone, twon woo mo malongo adada oromo ot woko. Onongo winnye calo yamo ma tye ka kodo matek. Ci leb mac ocako nyutte i wi lupwonnye ducu ki acel acel. Itye ka neno mac i wi gin ducu ki acel acel? Man ducu te lokke ningo?
Man tango! Yecu odok cen i polo bot Wonne, dong en tye ka oonyo cwiny maleng pa Lubanga i kom lulub kore. In ingeyo gin ma cwiny man omiyo gin otimo? Gin ducu gucako loko leb mapatpat.
Jo mapol i Jerucalem guwinyo woo ma winye calo yamo ma kodo matek, ci gubino me ngeyo gin ma tye ka timme. Jo mogo ma gua ki i lobo mukene gubino kany pi karama pa Luicrael me Pentekote. Kit ma welle magi gunongo gin me aura kwede! Gin guwinyo lupwonnye ka giloko i leb tugi pi jami mabeco me aura ma Lubanga otimo.
Welle-ni guwaco ni: ‘Jo magi ducu gin Lugalilaya. Ocakke dok nining, ni gitwero loko leb magi mapatpat me lobe ma wan wa a ki iye?’
Petero kombeddi dong oa malo me tito botgi. En omedo dwane malo ci otito bot lwak kit ma kineko Yecu kwede ki ni Jehovah ocero en woko ki i to. Petero owaco ni: ‘Kombeddi Yecu tye i polo i nget Lubanga yo tung acuc. Dok en oonyo cwiny maleng ma kiciko pire-ni. Man aye gin mumiyo wuneno dok wuwinyo tango magi.’
Dong i kare ma Petero owaco lok magi, pol dano cwinygi oton pi gin ma kitimo i kom Yecu. Gin gupenyo ni: ‘Wan omyero watim ango?’ Petero otito botgi ni: ‘Mitte ni myero wulok kit me kwowu ci wunong batija.’ Pi meno i nino meno kikome cokcok dano 3,000 gunongo batija ci gudoko lulub kor Yecu.
