ABA abantu ulemona apa basambi ba kwa Yesu. Balikonkele ifyo abebele, e co baikaliile mu Yerusalemu. Ilyo balelolela, baumfwile mu ng’anda monse umo bali mwaba icongo. Icongo caumfwikike kwati mwela uukalamba uulepuupa. Indimi ishali kwati umulilo shatendeke ukumoneka pa mitwe yonse iya basambi. Bushe nauumona umulilo uuli pa mitwe ya basambi? Bushe cinshi cilecitika?

Ici cipesha amano! Apa ninshi Yesu alibwelela ku muulu kuli Wishi, e ico apongolwelele umupashi wa mushilo uwa kwa Lesa pa basambi bakwe. Bushe walishiba ico umupashi walengele abasambi ukucita? Bonse batampile ukulanda mu ndimi ishalekanalekana.

Abantu abengi mu Yerusalemu balyumfwile icongo icali kwati cipuupu ca mwela, kabili baliile mu kumona ifyalecitika. Bamo abaile mu kusefya Pentekoste ya bena Israele bafumine ku fyalo fimbi. Aba bantu, balipapile pa cacitike! Baumfwile abasambi balelanda mu ndimi sha ku fyalo bafumine pa fisuma ifyo Lesa abacitiile.

E ico balandile pa basambi abati: ‘Aba bantu bonse bafumine ku Galili, nomba cinshi balelandila muli ishi indimi sha ku fyalo twafuma?’

Awe Petro alimine no kutendeka ukulondolola icacitike. Aebele abantu mwi shiwi ilikalamba ifyo Yesu afwile ne fyo Yehova amubuushishe ku bafwa. Petro atile: ‘Yesu nomba ali mu muulu ku kuboko kwa kulyo ukwa kwa Lesa. Kabili napongolola umupashi wa mushilo uo atulaile. E co mwamwena no kumfwa ifi ifipesha amano.’

Ilyo Petro alandile ifi fintu, abantu abengi balyumfwile ububi pa fyacitikile Yesu. Baipwishe abati: ‘Finshi tufwile ukucita?’ Petro abebele ati: ‘Mulingile ukulapila no kubatishiwa.’ E ico pali bulya bwine ubushiku, abantu nalimo 3,000 balibatishiwe no kuba abasambi ba kwa Yesu.