OL MAN ya, oli man blong Jisas. Oli obei long tok blong hem se oli mas wet long Jerusalem. Taem oli stap joen wanples blong wet, wantaem nomo, wan noes i kamaot long skae, i kavremap olgeta ples long haos ya we oli stap sidaon insaed long hem. Noes ya i olsem wan bigfala win we i blu. Mo wan samting olsem faea we i laet, i sidaon long hed blong ol wanwan disaepol ya. ?Yu yu luk ol smosmol faea ya long pija? ?Wanem mining blong samting ya?

!Hemia wan merikel ya! Jisas i stap bakegen long heven wetem Papa blong hem, nao hem i sanem tabu spirit blong God i kamdaon long ol man blong hem. ?Spirit ya i givim paoa long olgeta blong mekem wanem? Oli stat toktok long ol defdefren lanwis.

Plante man long Jerusalem oli harem noes ya we i olsem wan strong win, nao oli kam blong luk wanem samting i stap kamaot. Sam long olgeta ya oli blong ol narafala kantri, be oli kam long Jerusalem blong joen long lafet blong Pentekos we ol man Isrel oli stap mekem. !Ol man ya oli sapraes tumas long samting we oli luk! Oli luk we ol disaepol oli stap tok long ol lanwis blong olgeta ya, oli stap talemaot ol bigbigfala wok we God i mekem.

Ol man blong ol narafala ples ya oli talem se: ‘!Ei! Ol man ya oli man Galili nomo. ?Olsem wanem oli save toktok long ol lanwis blong yumi olsem?’

Ale Pita i stanap, i eksplenem mining blong ol samting ya. Hem i tok long bigfala voes, i talem long ol man ya olsem wanem Jisas i ded mo olsem wanem Jeova i mekem hem i laef bakegen. Hem i se: ‘God i leftemap Jisas i go antap finis, i stap long raet saed blong hem. Nao Jisas i sanem tabu spirit i kamdaon long yumi olsem we hem i promes blong mekem. Ol samting ya we yufala i luk, mo we yufala i stap harem, oli merikel we tabu spirit i mekem.’

Plante man we oli harem tok ya blong Pita, oli sore tumas we ol man oli nilim Jisas long pos, ale oli askem long Pita se: ‘?Bambae mifala i mekem olsem wanem?’ Pita i talem long olgeta se: ‘Yufala i mas jenisim laef blong yufala, mo yufala i mas tekem baptaes.’ Ale, long dei ya, samwe long 3,000 man oli kam ol man blong Jisas mo oli tekem baptaes.

Ol Wok 2:1-47.