Maana 105nan

U bɛ makɔnɔni na Jerusalɛm

MƆGƆ minnu bɛ yan yɔrɔ la, olu ye Yesu nɔfɛmɔgɔw ye. Yesu y’a fɔ u ye cogo min na, u y’a kɛ ten. U tora Jerusalɛm. U bɛɛ tun bɛ makɔnɔni na ɲɔgɔn fɛ tuma min na, mankanba dɔ sinna ka bɔ min ye so kɔnɔna bɛɛ fa. A mankan tun bɛ i ko fiɲɛba min bɛ ci ni barika ye. O kɔfɛ, tamɛnɛ bɔra i ko nɛnkun bisigi ka sigi kalanden kelen-kelen bɛɛ kunna. Yala i ɲɛ bɛ o tasumamɛnɛ na u kelen-kelen bɛɛ kunna wa? O ko bɛɛ kɔrɔ ye mun ye?

O tun ye kabako ye dɛ! Yesu seginna a Fa fɛ sankolo la. Sisan a bɛ ka Ala ka hakili senu jigin a nɔfɛmɔgɔw kan. I b’a dɔn o hakili senu ye u bila ka min kɛ wa? U bɛɛ ye kan wɛrɛw fɔli daminɛ .

Mankan min bɔra i ko fiɲɛba mankan, mɔgɔ caman ye o mɛn Jerusalɛm dugu kɔnɔ. O kosɔn, u nana a filɛ fɛn min kɛra. O mɔgɔ minnu nana filɛli la, olu dɔw tun bɛ bɔ jamana wɛrɛw la. U tun nana Jerusalɛm walisa ka Israɛlkaw ka Pantekɔte seli kɛ. O mɔgɔw kabakoyara kosɛbɛ ka kalandenw mɛn ka kuma Ala ka dakabanako kɛlenw kan, u yɛrɛw ka kanw na.

O mɔgɔw y’a fɔ ko: ‘Nin mɔgɔw bɛɛ bɛ bɔ Galile. A dun kɛra cogo di ko an bɛ bɔ jamana minnu na, u bɛ se ka o jamanaw ka kanw fɔ?’

Piɛrɛ y’i wuli k’i jɔ sisan ka a kan kɔrɔta ka o kɔrɔ ɲɛfɔ u ye. Yesu fagara cogo min na, ani Ala tilala cogo min na k’a lakunun, Piɛrɛ ye o fɔ. A y’a fɔ fana ko: ‘Yesu bɛ sankolo la sisan Ala kininbolo fɛ. Ale de ye hakili senu jigin ka na, i ko a y’a layidu ta cogo min na. O hakili senu de y’a to aw ye nin kabakow ye, k’u mɛn.’

Mɔgɔw ye Piɛrɛ ka kumaw mɛn tuma min na, u caman dusu kasira kosɛbɛ bawo u ye min kɛ Yesu la, o tun ye kojuguba ye. U ye Piɛrɛ ɲininka sa ko: ‘An ka kan ka mun kɛ?’ Piɛrɛ ko: ‘Aw ka kan ka aw ka ɲɛnamaya kɛcogo yɛlɛma, ka batise.’ O don yɛrɛ la mɔgɔ 3 000 batisera ka kɛ Yesu kalandenw ye.

Kɛwalew 2:​1-47.