WE DULEMAR Jesúsba nanamalad. Ega igar uglesadbali imasmala geb Jerusalén gine anbaggusmala. Degi abiddobugmalad gine, ibmar binnasur bela neg yaba gornoniggi. Uggiagwar burwa binnasur megnoniggi yobi. Geb bela bugmalad nono birgine soo duu gae dagleali. ¿Be dagsa sobarnaidgi, Jesús sabbingan nono birgi soo gabugmalad? ¿Ibu wede obarsunna?

¡Weyob ibmar gudi sulinad! Emisgi Jesús gannar e Bab waliggi gudibali nibneg gine, geb eba nanamalad gala Babdummad gangued emisgi ugmai. ¿Be wisi we gangued, ibu wemar nabir imagge imagnoniggi? Bela wemar gaya aggaraggar sunmaggarmala.

Buggidar Jerusalén gine dulemar gudimalad iddosmala burwa binnasuli yobi ibmar binnasur gole, geb nonimala daggega igi neggunai. Abar dulemar neggwebur bamalad sigi danimala, Pentecostés iba onomalaga; we ibadi Israel dulemar gadi. ¡Dulemar neggwebur baidsig danimaladi geger dagdemala! Ar Jesús sabbingan we dulemar gaya sunmagmaladba sunmaggarmarmoga, Bab ibmar nuegan imagmaid gine.

Geb soggarmala: ‘Bela we dulemar, ¿Galilea dulemarsursi? Ar, ¿igi degiddega, gagga aggaraggar nabir sunmagmala, anmar neggweburmar danimalad gaya bali?’.

Pedro emis gine gwisguali, emarga odalogega. Geb emar gala binnasur sogde igi Jesús oburgwilesa, geb igi Jehová gannar odulosbali. ‘Emisgi Jesús nibneg gine Babdummad saggwa nued siggi sii’, Pedro soge. ‘Degine emisgi Babdummad gangued uggoye sogsad ugsa. Agala we ibmar gudisulinad gunai bemar dagged’.

Deyob Pedro ibmar sogsagua, buggidar abar iddobugmaladi buggibbinsaarmala Jesús oburgwilesadba. Geb egidsarmala: ‘¿Ibu anmar imagged abelesunna?’ Pedro ega abinsoge: ‘Bemar daed na ogwamalar gebed, geb bautizar imagmarbalir gebe’. Aa ibag 3.000 mergusaar dulemar bautizar imasmala, geb Jesúsba nagusmala.